ملی ٹینٹ فنڈنگ کیس:ایس آئی اے نے ملزم کے خلاف چارج شیٹ پیش کی

سرینگر//
جموں کشمیر سٹیٹ انوسٹی گیشن ایجنسی (ایس آئی اے ) نے جمعے کے روز این آئی اے کی خصوصی عدالت میں ملی ٹینٹ فنڈنگ کیس کے سلسلے میں ملزم کے خلاف چارج شیٹ پیش کیا۔
ایس آئی اے کے ایک ترجمان نے بتایا کہ ایس آئی اے نے حماد فاروق ولد فاروق احمد ترمبو ساکن کاغذگری محلہ نوشہرہ کے خلاف عدالت مجاز میں چارج شیٹ دائر کیا۔
ترجمان نے کہاکہ خلیجی ممالک سے حوالہ رقم کے حوالے سے مصدقہ اطلاعات کے بعد گزشتہ سال پولیس اسٹیشن ایس آئی اے کشمیر میں قانون کی متعلقہ دفعات کے تحت ایف آئی آر زیر نمبر۹کے تحت کیس درج کیا گیاتھا۔انہوں نے بتایا کہ اس کیس کو منطقی انجام تک پہنچانے کی خاطر تحقیقات کا آغاز کیا جا چکا ہے ۔
ایس آئی اے ترجمان نے بتایا کہ تحقیقات کے دوران یہ بات سامنے آئی ہے کہ ملزم نے سوشل میڈیا کے ذریعے ملی ٹینٹوں کے ساتھ روابط استوار کئے تھے اور دہشت گردوں کے ساتھ رچی گئی مجرمانہ سازش کے تحت ملزم نے سعودی عرب او ر عمان سے آئی سی آئی سی آئی بینک برانچ میکلوڈ گنج ، ہماچل پردیش میں بینک چینلز کا استعمال کرتے ہوئے حوالہ کے ذریعے فنڈز حاصل کئے تھے ۔
ترجمان نے کہاکہ یہ بھی منظر عام پر آیا ہے کہ حوالہ کے ذریعے فنڈز حاصل کرنے کے بعد ملزم نے اس سے سرگرم جنگجوؤں اور مارے گئے ملی ٹینٹوں کے اہل خانہ/رشتہ داروں میں تقسیم کیا۔
ترجمان کاکہنا ہے کہ سرحد کے اُس پار بیٹھے ملی ٹینٹ سابئیر نیٹ ورک کا استعمال کرکے کشمیر کے نوجوانوں کو ملی ٹینسی اور دیگر تخریبی سرگرمیوں کو بڑھاوا دینے کی خاطر حوالہ فنڈز حاصل کرنے اور اُنہیں اکھٹا کرنے کی ترغیب دے رہے ہیں۔
ترجمان نے بتایا کہ جمعے کے روز این آئی اے سری نگر کی خصوصی عدالت میں ملزم کے خلاف چارج شیٹ پیش کی گئی۔