ایشیا کپ کیلئے شاہین آفریدی کی جگہ حسنین پاکستان ٹیم میں شامل

لاہور// پاکستان کرکٹ بورڈ (پی سی بی) نے زخمی تیزگیندباز شاہین شاہ آفریدی کی جگہ محمد حسنین کو ایشیا کپ کے لیے متبادل کے طور پر ٹیم میں شامل کیاہے۔
ڈان نیوز کے مطابق پی سی بی نے ایک بیان میں کہا کہ 22 سالہ نوجوان نے 18 ٹی20 انٹرنیشنل میچوں میں پاکستان کی نمائندگی کی ہے جس میں وہ اب تک 17 وکٹیں حاصل کر چکے ہیں۔
اس سلسلے میں بتایا گیا کہ حسنین انگلینڈ سے براہ راست ٹیم میں شامل ہوں گے جہاں وہ دی ہنڈریڈ مقابلے میں اوول انوینسیبلز کی نمائندگی کر رہے ہیں۔ایشیا کپ رواں ماہ 27 اگست سے 11 ستمبر تک متحدہ عرب امارات میں کھیلا جائے گا۔
واضح رہے کہ مشکوک باؤلنگ ایکشن سے کلیئر ہونے کے بعد حسنین پہلی مرتبہ قومی ٹیم کی نمائندگی کریں گے۔
سری لنکا کے خلاف ٹیسٹ سیریز میں انجری کا شکار ہونے والے فاسٹ باؤلر شاہین شاہ آفریدی گھٹنے کی انجری کی وجہ سے ایشیا کپ اور انگلینڈ کے خلاف ٹی ٹوئنٹی ہوم سیریز سے باہر ہو گئے تھے۔
پی سی بی کی میڈیکل ٹیم نے گیندبازکو چار سے چھ ہفتے آرام کا مشورہ دیا تھا اور توقع ہے کہ باؤلر اکتوبر میں ٹی20 ورلڈ کپ سے قبل نیوزی لینڈ کے خلاف ٹی20 سیریز کے ساتھ انٹرنیشنل کرکٹ میں واپسی کرنے میں کامیاب ہوجائیں گے۔
آج پاکستان کرکٹ بورڈ کی جانب سے جاری کیے گئے بیان میں مزید بتایا گیا کہ آصف علی، حیدر علی، افتخار احمد اور عثمان قادر منگل کی صبح دبئی روانہ ہوں گے۔
بورڈ نے کہا کہ یہ کھلاڑی عبداللہ شفیق، امام الحق، محمد حارث، سلمان علی آغا اور زاہد محمود کی جگہ لیں گے جو نیدرلینڈز کے خلاف 16 رکنی ون ڈے اسکواڈ کا حصہ تھے۔
پاکستان 28 اگست کو دبئی میں روایتی حریف ہندوستان کے خلاف میچ سے اپنی ایشیا کپ 2022 کی مہم کا آغاز کرے گا جبکہ اس کا دوسرا گروپ میچ 2 ستمبر کو شارجہ میں کوالیفائر (یو اے ای، کویت، سنگاپور یا ہانگ کانگ) میں سے کسی ایک سے ہوگا۔
ایشیا کپ کے سپر فور میچز 3 سے 9 ستمبر تک کھیلے جائیں گے۔