لوگوں کے ’ہر گھر ترنگا‘ مہم کے حیرت انگیز ردعمل پربہت خوش ہوں اور فخر بھی ہے: مودی

نئی دہلی///
وزیر اعظم نریندر مودی نے ہفتہ کے روز کہا کہ وہ ملک بھر میں ’ہر گھر ترنگا‘ مہم کے’حیرت انگیز ردعمل‘ پر’بہت خوش اور فخر‘ ہیں۔ انہوں نے شہریوں پر زور دیا کہ وہ قومی پرچم کے ساتھ اپنی تصاویر بھی مہم کے لیے وقف سرکاری ویب سائٹ پر شیئر کریں۔
پی ایم مودی نے ایک ٹویٹ میں کہا’’ہر گھر ترنگا تحریک کے شاندار ردعمل پر بہت خوشی اور فخر ہے۔ ہم زندگی کے مختلف شعبوں میں لوگوں کی ریکارڈ شرکت دیکھ رہے ہیں۔ یہ آزادی کا امرت مہوتسو کو نشان زد کرنے کا ایک بہترین طریقہ ہے‘‘۔
پی ایم مودی نے ملک بھر میں منعقد ہونے والے پروگراموں کی جھلک بھی شیئر کی۔ ویب سائٹ پر اب تک قومی پرچم کے ساتھ دو کروڑ سے زیادہ سیلفیز اپ لوڈ کی جا چکی ہیں۔
اس سے پہلے دن میں، مرکزی وزیر داخلہ امت شاہ نے اپنی اہلیہ کے ساتھ نئی دہلی میں اپنی رہائش گاہ پر قومی پرچم لہرایا۔ انہوں نے مزید کہا کہ ہر کسی کو اپنی رہائش گاہوں پر قومی پرچم لہرانے اور اپنی تصاویر شیئر کرنے کی تلقین کی۔
مرکزی حکومت آزادی کے امرت مہوتسو کے تحت یوم آزادی کو خصوصی بنانے کیلئے’ہر گھر ترنگا‘مہم چلا رہی ہے ۔ یہ مہم ۱۳؍اگست یعنی آج سے شروع ہو کر۱۵؍اگست تک جاری رہے گی۔
شاہ نے۱۲؍اگست کو ہی اطلاع دی تھی کہ وہ ہفتہ کو اپنی رہائش گاہ پر ترنگا لہرائیں گے ۔ آج اس موقع پر انہوں نے مجاہدین آزادی اور پرچم کو خراج عقیدت پیش کیا۔
مرکزی وزیر نے ٹویٹ کیا’ترنگا ہمارا فخر ہے ۔ یہ تمام ہندوستانیوں کو متحد اور متاثر کرتا ہے‘ ۔انہوں نے اہل وطن پر زور دیا کہ وہ ۱۳؍سے۱۵؍اگست تک اپنے گھروں پر قومی پرچم لہرائیں۔
ہندوستان آزادی کی۷۵ویں سالگرہ منا رہا ہے ۔ ۱۵؍اگست یعنی یوم آزادی پر پورے ملک میں جوش و خروش دیکھا جا رہا ہے ۔ ‘ہر گھر ترنگا’ مہم آج سے شروع ہو گئی ہے ۔
دیگر اعلیٰ مرکزی وزراء جیسے ایس جے شنکر، نرملا سیتارامن، نرملا سیتارامن اور پیوش گوئل نے بھی اپنے اپنے سوشل میڈیا اکاؤنٹس پر قومی پرچم کی تصاویر شیئر کیں۔