شمالی ضلع بارہمولہ میں ریچھ نے کمسن لڑکے کو اپنا نوالہ بنایا‘ علاقے میں کہرام

سرینگر//
وادی کشمیر میں جنگلی جانوروں کا بستیوں میں نمودار ہوکر انسانوں پر حملہ آور ہونے کی خبریں بھی اب ایک معمول بن گئی ہیں۔
یہاں جنگلی جانوروں کے بستیوں میں آزادانہ گھومنے پھرنے اور انسانوں پر حملہ آور ہونے کے واقعات آئے روز اخباروں میں پڑھنے کو ملتے ہیں اور سوشل میڈیا پر ان کے خوفناک مناظر دیکھنے کو ملتے ہیں۔
شمالی ضلع بارہ مولہ کے واگورہ علاقے میں پیر کی شام کو آدم خور ریچھ نے ایک چار سالہ کمسن لڑکے کو اپنا نوالہ بنایا۔
سرکاری ذرائع نے بتایا کہ بارہ مولہ کے واگورہ علاقے میں ایک کمسن لڑکا گھر کے باہر ٹہل رہا تھا کہ اسی اثنا میں ریچھ نے اُس پر اچانک حملہ کیا۔
ذرائع نے بتایا کہ آس پاس موجود لوگوں اور اہل خانہ نے اگر چہ لڑکے کو ریچھ کے چنگل سے چھڑایا تاہم ہسپتال پہنچاتے پہنچاتے اُس کی موت واقع ہوئی۔متوفی کی شناخت احسن احمد شاہ کے بطور ہوئی ہے ۔
اس دلخراش واقعے سے جہاں علاقے میں ماتم چھایا ہے وہیں متعلقہ محکمہ کے خلاف لوگوں میں شدید غم وغصہ بھی پایا جارہا ہے ۔
قابل ذکر ہے کہ وادی کشمیر کے شمال وجنوب میں پچھلے دو ماہ کے دوران تیندوں اور ریچھوں کے حملوں میں نصف درجن کے قریب افراد اپنی قیمتی جانیں گنوا بیٹھیں ہیں جن میں چار کمسن شامل ہیں۔