مسلسل 13ویں مہینے جی ایس ٹی کی وصولی ایک لاکھ کروڑ سے زیادہ

نئی دہلی// جولائی 2022 میں اشیا اور خدمات ٹیکس (جی ایس ٹی) کی وصولی 28 فیصد بڑھ کر 1.49 لاکھ کروڑ روپے سے تجاوز کر گئی ، جس سے مسلسل 13 ویں مہینے جی ایس ٹی کی وصولی 1 لاکھ کروڑ روپے سے زیادہ رہی ۔ اپریل 2022 کے بعد جولائی دوسرا مہینہ رہا ہے جس میں جی ایس ٹی کی وصولی سب سے زیادہ رہی ہے ۔
وزارت خزانہ کی طرف سے آج جاری کردہ ماہانہ جی ایس ٹی محصولات کے اعداد و شمار کے مطابق جولائی 2022 میں مجموعی جی ایس ٹی آمدنی 1,48,995 کروڑ روپے رہی جس میں مرکزی جی ایس ٹی 25,751 کروڑ روپے ، ریاستی جی ایس ٹی 32,807 کروڑ روپے ، انٹیگریٹڈ جی ایس ٹی (آئی جی ایس ٹی) 79,518 کروڑ روپے شامل ہیں۔ آئی جی ایس ٹی میں درآمدات پر جمع ٹیکس کا حصہ 41,420 کروڑ روپے ہے ۔ معاوضہ سرچارج 10,920 کروڑ روپے رہا ہے اور اس کی درآمدات پر جمع ہونے والا سرچارج 995 کروڑ روپے شامل ہے ۔اس سال جولائی میں جمع ہونے والا ریونیو پچھلے سال کے اسی مہینے میں جمع ہونے والے ریونیو سے 28 فیصد زیادہ ہے ۔ گزشتہ سال جولائی میں یہ رقم 116393 کروڑ روپے رہی تھی۔
حکومت نے آئی جی ایس ٹی میں سے 32365 کروڑ روپے سی جی ایس ٹی میں اور 26774 کروڑ روپے ایس جی ایس ٹی میں منتقل کیے ہیں۔ باقاعدہ تصفیہ کے بعد جولائی میں مرکز کی آمدنی سی جی ایس ٹی کے طور پر 58116 کروڑ روپے اور ریاستوں کی ایس جی ایس ٹی کے طور پر 59581 کروڑ روپے رہی ہے ۔وزارت خزانہ نے کہا، "مسلسل پانچ مہینوں سے ماہانہ جی ایس ٹی کی آمدنی 1.4 لاکھ کروڑ روپے سے زیادہ رہی ہے ، جو ہر مہینے میں مسلسل اضافہ کو ظاہر کرتی ہے ۔ اس سال مارچ سے جولائی تک جی ایس ٹی کی آمدنی ہر ماہ 1.40 لاکھ کروڑ روپے سے زیادہ رہی ہے ۔
وزارت نے کہا کہ محصولات کی وصولی میں اضافہ بہتر تعمیل، معیشت کی حالت میں بہتری اور جی ایس ٹی کونسل کے مختلف اقدامات کی وجہ سے ممکن ہو سکی ہے ۔ انہوں نے کہا کہ معاشی حالت میں بہتری کے ساتھ ساتھ بہتر رپورٹنگ کا محصولات کی وصولی پر سازگار اثر پڑا ہے ۔ وزارت نے کہا کہ جون 2022 میں 7.45 کروڑ ای وے بل جاری کیے گئے جو مئی 2022 کے 7.36 کروڑ سے معمولی زیادہ رہے ۔