یو اے ای کے صدر شیخ نہیان کی مودی سے فون پر بات چیت، مغربی ایشیا کی صورتحال پر تبادلہ خیال اور سالگرہ کی مبارکباد

نئی دہلی، 18 ستمبر (یو این آئی) وزیراعظم نریندر مودی اور متحدہ عرب امارات (یو اے ای) کے صدر شیخ محمد بن زاید آل نہیان نے مختلف شعبوں میں دوطرفہ تعلقات کو مضبوط بنانے اور مغربی ایشیا کی تازہ صورتحال پر بات چیت کی۔
وزیراعظم کے دفتر نے جمعہ کو ایک پریس ریلیز میں بتایا کہ یو اے ای کے صدر نے وزیراعظم مودی کو ٹیلی فون کیا اور انہیں سالگرہ کی مبارکباد اور نیک خواہشات پیش کیں۔ دونوں رہنماؤں نے ہندوستان -یو اے ای وسیع اسٹریٹجک شراکت داری کو مزید مضبوط کرنے کے لیے نئے اقدامات پر تبادلہ خیال کیا۔ ان میں توانائی، دفاع، ٹیکنالوجی، سرمایہ کاری اور صحت کے شعبے شامل ہیں۔
پریس ریلیز کے مطابق دونوں رہنماؤں نے مغربی ایشیا کی صورتحال پر اپنے خیالات کا تبادلہ کیا۔ انہوں نے خطے میں امن، سکیورٹی اور استحکام کو فروغ دینے کی کوششوں میں مسلسل تعاون اور ہم آہنگی کے عزم کا اعادہ کیا۔
پریس ریلیز میں کہا گیا ہے کہ یو اے ای کے صدر نے ہندوستان کی کامیاب برکس صدارت کے لیے وزیراعظم کو مبارکباد دی۔ وزیراعظم نے برکس سربراہ اجلاس میں یو اے ای کی جانب سے ولی عہد شیخ خالد کی شرکت اور ہندوستان کی صدارت کے دوران ٹھوس نتائج حاصل کرنے میں یو اے ای کے تعاون اور شراکت داری کے لیے ان کا شکریہ ادا کیا۔