۵۸‘کلو پوست بھوسہ بر آمد‘اسمگلر گرفتار
جموں؍۵؍اگست
جموں و کشمیر پولیس نے منشیات کے خلاف جاری مہم کے دوران ایک بڑی کامیابی حاصل کرتے ہوئے سانبہ ضلع میں بین الریاستی منشیات اسمگلنگ کے ایک نیٹ ورک کا پردہ فاش کیا اور۵۸ء۰۶۸ کلو گرام پوست بھوسہ (پاپی اسٹرا) سمیت ایک مبینہ منشیات سپلائر کو گرفتار کر لیا۔
سرکاری بیان کے مطابق یہ کارروائی پولیس اسٹیشن گھگوال کی حدود میں انجام دی گئی، جس سے علاقے میں سرگرم غیر قانونی منشیات کے کاروبار کو بڑا دھچکا پہنچا ہے۔
بیان میں کہا گیا ہے کہ منشیات کی نقل و حمل سے متعلق موصول ہونے والی مصدقہ خفیہ اطلاع کی بنیاد پر پولیس نے قومی شاہراہ (این ایچ ڈبلیو) ٹپیال پر ایک منظم ناکہ قائم کر کے گاڑیوں کی تلاشی شروع کی۔
اسی دوران کٹھوعہ سے باری برہمنہ کی طرف جا رہے ایک کنٹینر ٹرک کو تفصیلی تلاشی کے لیے روکا گیا۔
پولیس کے مطابق تلاشی کے دوران کنٹینر ٹرک کے اندر انتہائی مہارت سے چھپایا گیا تقریباً۵۸ء۰۶۸ کلو گرام پوست بھوسہ برآمد کیا گیا، جسے پولیس کی نظروں سے بچانے کی کوشش کی گئی تھی۔
ٹرک کے ڈرائیور دیپک سنگھ ولد ساکن سیشواں، تحصیل مرہین، ضلع کٹھوعہ کو موقع پر گرفتار کر لیا گیا۔پولیس نے برآمد شدہ منشیات کے علاوہ اسمگلنگ میں استعمال ہونے والا کنٹینر ٹرک بھی ضبط کر لیا ہے۔ بیان کے مطابق ضبط شدہ منشیات اور گاڑی کی مجموعی مالیت تقریباً۶۰ لاکھ روپے بتائی جا رہی ہے۔
پولیس نے متعلقہ دفعات کے تحت مقدمہ درج کر کے تحقیقات شروع کر دی ہے۔ابتدائی تحقیقات سے معلوم ہوا ہے کہ ملزم یہ کھیپ مدھیہ پردیش سے لے کر آیا تھا اور اس کے روابط پنجاب میں بھی موجود ہیں۔ اس منشیات کو کٹھوعہ اور سانبہ اضلاع میں سپلائی کرنے کا منصوبہ تھا۔
پولیس کے مطابق بین الریاستی منشیات اسمگلنگ نیٹ ورک کی مکمل سپلائی چین، منشیات کے اصل ذرائع اور اس سے جڑے آگے اور پیچھے کے روابط کا پتہ لگانے کے لیے مزید تحقیقات جاری ہے۔
سانبہ کے سینئر سپرنٹنڈنٹ آف پولیس (ایس ایس پی) نے منشیات کے خلاف زیرو ٹالرنس پالیسی کا اعادہ کرتے ہوئے کہا کہ سانبہ پولیس معاشرے سے منشیات کی لعنت کے مکمل خاتمے کے لیے پُرعزم ہے۔انہوں نے کہا کہ منشیات کے کاروبار میں ملوث ہر فرد کے خلاف سخت قانونی کارروائی جاری رہے گی تاکہ ایک محفوظ، صحت مند اور منشیات سے پاک معاشرہ قائم کیا جا سکے۔
۔۔۔۔۔۔۔(ایجنسیاں )
