ٹریائی کی کال ڈراپ، کوریج، انٹرنیٹ رفتار اور سگنل معیار کا آزادانہ تجزیہ، متعلقہ کمپنیوں کو بہتری کی ہدایت
(ندائے مشرق خبر)
سرینگر/ ۴ ؍اگست
ٹیلی کام ریگولیٹری اتھارٹی آف انڈیا (ٹریائی) نے جموں و کشمیر لائسنسڈ سروس ایریاکے تحت سرینگر، گلمرگ، اننت ناگ، پہلگام اور سرینگر۔پہلگام و سرینگر۔گلمرگ شاہراہوں پر موبائل نیٹ ورک کے معیار سے متعلق آزادانہ ڈرائیو ٹیسٹ کی رپورٹ جاری کر دی ہے۔
رپورٹ کے مطابق مجموعی طور پر جیو اور ایئرٹیل کی فائیو جی خدمات نے بہتر کارکردگی کا مظاہرہ کیا، جبکہ بی ایس این ایل اور ووڈافون آئیڈیا (وی آئی ایل) کو کئی اہم شعبوں میں نیٹ ورک کی بہتری کی ضرورت ہے۔
ٹریائی کے مطابق یہ ٹیسٹ جون ۲۰۲۶ کے دوران کیے گئے جن کا مقصد مختلف ٹیلی کام کمپنیوں کی حقیقی وقت میں آواز (Voice) اور ڈیٹا خدمات کے معیار کا جائزہ لینا تھا۔’’اس دوران سگنل کوریج، کال ڈراپ ریٹ، کال کنکشن کی کامیابی، انٹرنیٹ ڈاؤن لوڈ و اپ لوڈ رفتار، لیٹنسی اور دیگر تکنیکی اشاریوں کا تفصیلی تجزیہ کیا گیا‘‘۔
رپورٹ کے مطابق سرینگر اور گلمرگ میں اوسط ڈاؤن لوڈ رفتار کے لحاظ سے جیو 276.92 ایم بی پی ایس کے ساتھ پہلے، جبکہ ایئرٹیل 188.64 ایم بی پی ایس کے ساتھ دوسرے نمبر پر رہا۔ بی ایس این ایل کی اوسط رفتار 10.77 ایم بی پی ایس اور وی آئی ایل کی 24.14 ایم بی پی ایس ریکارڈ کی گئی۔
اسی طرح اننت ناگ اور پہلگام میں ایئرٹیل کی اوسط ڈاؤن لوڈ رفتار 183.84 ایم بی پی ایس جبکہ جیو کی 163.53 ایم بی پی ایس رہی۔ بی ایس این ایل اور وی آئی ایل کی رفتار بالترتیب 6.86 اور 12.92 ایم بی پی ایس ریکارڈ کی گئی۔
سرینگر۔پہلگام شاہراہ پر ایئرٹیل نے تقریباً 192 ایم بی پی ایس کی اوسط ڈاؤن لوڈ رفتار حاصل کی، جبکہ جیو کی رفتار 88.24 ایم بی پی ایس رہی۔ بی ایس این ایل اور وی آئی ایل کی رفتار بالترتیب 14.61 اور 14.27 ایم بی پی ایس ریکارڈ کی گئی۔
اسی طرح سرینگر۔گلمرگ شاہراہ پر ایئرٹیل کی اوسط ڈاؤن لوڈ رفتار 176.89 ایم بی پی ایس، جیو کی 88.14 ایم بی پی ایس، وی آئی ایل کی 13.80 ایم بی پی ایس اور بی ایس این ایل کی 8.82 ایم بی پی ایس رہی۔
رپورٹ میں کال ڈراپ، سگنل کوریج اور کال کے دوران خاموشی کے معاملات میں بھی ایئرٹیل اور جیو کی کارکردگی نسبتاً بہتر قرار دی گئی، جبکہ بی ایس این ایل اور وی آئی ایل کے نیٹ ورک میں کئی مقامات پر زیادہ کوریج گیپ، کال ڈراپ اور سگنل کے مسائل ریکارڈ کیے گئے۔
ٹریائی نے بتایا کہ یہ آزادانہ جانچ ۸ سے ۱۲ جون ۲۰۲۶ کے درمیان سرینگر، گلمرگ، اننت ناگ، پہلگام، دونوں شاہراہوں، اہم عوامی مقامات، ریلوے اسٹیشن، ایس ایم ایچ ایس اسپتال، کشمیر یونیورسٹی، لال چوک اور دیگر علاقوں میں کی گئی، جہاں 2جی، 3جی، 4جی اور 5جی نیٹ ورک پر حقیقی صارفین کی طرح کالز اور انٹرنیٹ سیشنز کے ذریعے خدمات کا جائزہ لیا گیا۔
ٹریائی نے واضح کیا کہ یہ نتائج صرف ان مقامات اور اوقات کی عکاسی کرتے ہیں جہاں جانچ کی گئی تھی۔ ادارے نے اپنی رپورٹ تمام متعلقہ ٹیلی کام کمپنیوں کو بھی ارسال کر دی ہے تاکہ وہ جہاں ضرورت ہو وہاں نیٹ ورک میں بہتری کے لیے ضروری اقدامات کریں۔
