جموں کشمیرکو ’اُلّاس‘ اسکیم کے تحت مکمل خواندگی کا ہدف حاصل
(ڈی آئی پی آر )
سرینگر؍ ۴ ؍اگست
جموں و کشمیر نے حکومتِ ہند کی اُلّاس اسکیم کے تحت مکمل خواندگی کا سنگِ میل حاصل کرتے ہوئے مکمل خواندہ ریاستوں اور مرکز کے زیر انتظام علاقوں کی فہرست میں شمولیت اختیار کر لی ہے۔
لیفٹیننٹ گورنر منوج سنہا نے اس تاریخی کامیابی پر اساتذہ، انتظامیہ اور اس مہم سے وابستہ تمام متعلقہ فریقوں کو دلی مبارک باد پیش کی ہے۔
سوشل میڈیا پلیٹ فارم ایکس پر اپنے پیغام میں لیفٹیننٹ گورنر نے کہا:’’جموں و کشمیر حکومتِ ہند کی اُلّاس اسکیم کے تحت مکمل خواندہ ریاستوں اور مرکز کے زیر انتظام علاقوں کی صف میں شامل ہونے پر فخر محسوس کرتا ہے۔۹۹ء۰۹ فیصد کامیابی کے ساتھ جموں و کشمیر اب تک اس سنگِ میل کو حاصل کرنے والا سب سے زیادہ آبادی والا خطہ بن گیا ہے۔ اس کامیابی کو ممکن بنانے والے اساتذہ، منتظمین اور تمام متعلقہ افراد کو مبارک باد۔ ہمیں ہمیشہ یاد رکھنا چاہیے کہ تعلیم ہی بااختیار بنانے کی سب سے بڑی قوت ہے اور اس مشن کو آگے بڑھانا ہم سب کی اجتماعی ذمہ داری ہے۔‘‘
سرکاری اعداد و شمار کے مطابق اُلّاس اسکیم کے تحت جموں و کشمیر میں ایک لاکھ ۸۰ ہزار ۳۱۷ غیر خواندہ افراد کی نشاندہی کی گئی تھی، جن میں سے ایک لاکھ ۷۸ ہزار ۶۸۰ افراد نے خواندگی کا امتحان کامیابی سے پاس کیا، جو۹۹ء۰۹فیصد کامیابی کی شرح بنتی ہے۔
حکومتِ ہند کے طے کردہ معیار کے مطابق کسی بھی ریاست یا مرکز کے زیر انتظام علاقے کو مکمل خواندہ قرار دینے کے لیے ۹۵ فیصد یا اس سے زیادہ شرحِ خواندگی کا حصول ضروری ہے، کیونکہ بڑھاپے اور ذہنی استعداد جیسے عوامل کے باعث سو فیصد خواندگی کا حصول عملی طور پر ممکن نہیں سمجھا جاتا۔
اس مقصد کے حصول کے لیے تمام ریاستوں اور مرکز کے زیر انتظام علاقوں نے اپنی اپنی حکمتِ عملی، منصوبہ بندی اور بہترین طریقۂ کار اختیار کیا۔
اب تک نو ریاستیں اور مرکز کے زیر انتظام علاقے اُلّاس اسکیم کے تحت خود کو مکمل خواندہ قرار دے چکے تھے، جن میں لداخ، میزورم، گوا، تریپورہ، ہماچل پردیش، چندی گڑھ، انڈمان و نکوبار جزائر، سکم اور اتراکھنڈ شامل ہیں۔
جموں و کشمیر اس فہرست میں شامل ہونے والا دسواں خطہ ہے، جبکہ اب تک مکمل خواندہ قرار دیے گئے تمام ریاستوں اور مرکز کے زیر انتظام علاقوں میں سب سے زیادہ آبادی رکھنے والا خطہ بھی ہے۔
