ایجنسیاں
سرینگر؍۲۷جولائی
نشہ مکت جموں و کشمیر ابھیان کے تحت منشیات کے خلاف اپنی مہم کو مزید تیز کرتے ہوئے سرینگر پولیس نے اتوار کے روز نارکوٹک ڈرگز اینڈ سائیکو ٹروپک سبسٹینسز (این ڈی پی ایس) ایکٹ‘۱۹۸۵ کی دفعہ۶۸ایف کے تحت تقریباً۵ کروڑ۶۰ لاکھ روپے مالیت کی۸غیر منقولہ جائیدادیں ضبط کر لیں۔
پولیس کے مطابق اس کارروائی کا مقصد منشیات کی اسمگلنگ میں ملوث نیٹ ورکس کے مالیاتی ڈھانچے کو نشانہ بناتے ہوئے ان اثاثوں کو ضبط کرنا ہے جو مبینہ طور پر منشیات کی غیر قانونی تجارت سے حاصل ہونے والی آمدنی سے خریدے گئے تھے۔
سرکاری بیان کے مطابق پولیس اسٹیشن چناپورہ نے این ڈی پی ایس ایکٹ کے تحت درج مختلف مقدمات کے سلسلے میں 7 جائیدادیں ضبط کیں۔ ان جائیدادوں کی مالیت بالترتیب۶۵ لاکھ روپے‘۶۰ لاکھ روپے‘۷۵ لاکھ روپے‘۳۵ لاکھ روپے، ایک کروڑ روپے‘۷۵ لاکھ روپے اور۷۰ لاکھ روپے ہے، جو مختلف ایف آئی آرز میں نامزد افراد کی ملکیت ہیں۔
ادھر پولیس اسٹیشن صدر نے۲۰۲۶میں درج ایک این ڈی پی ایس مقدمے کے سلسلے میں تقریباً۸۰ لاکھ روپے مالیت کا ایک رہائشی مکان بھی ضبط کیا۔
پولیس کا کہنا ہے کہ تحقیقات کے دوران یہ ثابت ہوا کہ ضبط کی گئی تمام جائیدادیں منشیات کی اسمگلنگ سے حاصل ہونے والی غیر قانونی آمدنی سے خریدی گئی تھیں۔ یہ کارروائی این ڈی پی ایس ایکٹ کی متعلقہ دفعات کے مطابق عمل میں لائی گئی ہے اور جہاں ضروری ہوگا وہاں متعلقہ مجاز اتھارٹی کی توثیق سے مشروط رہے گی۔
پولیس کے ترجمان نے کہا’’سرینگر پولیس منشیات فروش گروہوں کے مالیاتی ڈھانچے کو مکمل طور پر تباہ کرنے کے اپنے عزم پر قائم ہے۔ منشیات فروشوں کو غیر قانونی دولت سے محروم کرکے ہمارا مقصد ان معاشی نیٹ ورکس کو توڑنا ہے جو منشیات کی لعنت کو فروغ دیتے ہیں، اور یہ واضح پیغام دینا ہے کہ جرم کبھی فائدہ مند ثابت نہیں ہوگا‘‘۔
سرینگر پولیس نے منشیات سے پاک معاشرے کے قیام کے اپنے عزم کا اعادہ کرتے ہوئے عوام سے اپیل کی ہے کہ وہ منشیات کی اسمگلنگ سے متعلق کسی بھی قابل اعتماد اطلاع کو پولیس کے ساتھ شیئر کریں۔ پولیس نے یقین دلایا کہ اطلاع دینے والوں کی شناخت مکمل طور پر خفیہ رکھی جائے گی۔
