نئی دہلی، 22 جولائی (یو این آئی) کاکروچ جنتا پارٹی (سی جے پی) نے نیٹ پیپر لیک اور مرکزی وزیرِ تعلیم دھرمیندر پردھان کے استعفیٰ کا مطالبہ کرتے ہوئے بھوک ہڑتال کر رہے سماجی کارکن سونم وانگچک کو بدھ کو خط لکھ کر اپنی بھوک ہڑتال ختم کرنے کی جذباتی اپیل کی ہے۔
سوشل میڈیا پر سی جے پی کی طرف سے جاری کھلے خط میں کہا گیا ہے، "پورے احترام اورتشکر کے ساتھ، ہم آپ سے (مسٹر سونم) عاجزانہ درخواست کرتے ہیں کہ برائے مہربانی اپنی بھوک ہڑتال ختم کریں۔ آپ کی قربانی نے پورے ملک کے ہزاروں طلبہ کو متحرک کیا ہے۔ گزشتہ 20 جولائی کو مختلف ریاستوں سے نوجوان آپ کی اور اس تحریک کی حمایت میں آئے۔ آپ نے یہ ثابت کر دیا ہے کہ یہ لڑائی کسی ایک شخص سے بڑی ہے اور طلبہ کو انصاف ملنا چاہیے۔” طلبہ کے حقوق اور امتحانی انصاف کے مطالبے کو لے کر چلائی جا رہی تحریک کے درمیان حامیوں نے بھوک ہڑتال پر بیٹھے سونم سر سے اپنی بھوک ہڑتال ختم کرنے کی جذباتی اپیل کی ہے۔ سوشل میڈیا پر سی جے پی کے کھلے خط میں ان سے اپنی صحت کی دیکھ بھال کرنے کی گزارش کی گئی ہے۔
پارٹی نے مسٹر سونم سے اپنی صحت کی دیکھ بھال کرنے کی گزارش کرتے ہوئے وعدہ کیا ہے کہ ان کی بھوک ہڑتال ختم کرنے سے یہ جدوجہد ختم نہیں ہوگی۔ خط میں کہا گیا ہے، "ہم احتجاجی مظاہرہ جاری رکھیں گے اور امتحان میں انصاف کے اپنے مطالبات پورے ہونے تک اس لڑائی کو آگے بڑھاتے رہیں گے۔ اس تحریک کو جاری رکھنے کے لیے ہم اپنی طرف سے ہر ممکن کوشش کریں گے۔”
وزیرِ تعلیم کے استعفیٰ کا مطالبہ کرتے ہوئے جنتر منتر پر دھرنے پر بیٹھے مسٹر وانگچک کو پولیس اٹھا کر صفدر جنگ اسپتال لے گئی تھی، بعد میں دہلی ہائی کورٹ نے منگل کو میدانتا منتقل کرنے کی ہدایت دی۔ وہ اسپتال میں رہتے ہوئے بھی اپنی بھوک ہڑتال جاری رکھے ہوئے ہیں۔ ایسے میں یہ اپیل کافی اہم ہے۔
