سکھ ناگ کے کنارے واقع عمارتوں کا حفاظتی آڈٹ اور تباہ شدہ پلوں کی فوری بحالی کی ہدایت‘بارش سے پیدا صورتحال کا جائزہ
(ندائے مشرق خبر)
بڈگام؍۲۲ جولائی
وزیر اعلیٰ عمر عبداللہ نے آج ضلع بڈگام کے بیروہ کا دورہ کرکے مسلسل بارشوں اور نالہ سکھ ناگ میں طغیانی سے ہونے والے نقصانات کا جائزہ لیا۔
دورے کے دوران وزیر اعلیٰ نے بیروہ بس اسٹینڈ کا معائنہ کیا، جہاں سیلابی ریلے کے باعث حفاظتی دیوار منہدم ہونے سے ایک شاپنگ کمپلیکس بہہ گیا تھا۔ انہوں نے متاثرہ دکانداروں سے ملاقات کی، ان سے اظہارِ یکجہتی کیا اور یقین دلایا کہ جن دکانوں کی تعمیر سرکاری اجازت کے تحت کی گئی تھی، ان کے مالکان کو حکومت ہر ممکن مدد فراہم کرے گی۔
وزیر اعلیٰ نے ڈپٹی کمشنر بڈگام کو ہدایت دی کہ متاثرہ دکانداروں کی جانب سے جمع کرائے جانے والے تمام متعلقہ دستاویزات وصول کر کے ان کی جانچ کی جائے تاکہ حقیقی متاثرین کے معاوضے اور بازآبادکاری کے معاملات قواعد و ضوابط کے مطابق نمٹائے جا سکیں۔
متاثرہ تاجروں سے خطاب کرتے ہوئے عمر عبداللہ نے کہا کہ حکومت تمام اہل معاملات کا ہمدردانہ بنیادوں پر جائزہ لے گی اور ہر ممکن تعاون فراہم کرے گی۔
وزیر اعلیٰ نے دکانداروں کی جانب سے عارضی بازآبادکاری کے مطالبے کا بھی نوٹس لیتے ہوئے کہا کہ اگر حفاظتی جانچ میں عمارت محفوظ قرار دی جاتی ہے تو میونسپل کمیٹی کے نو تعمیر شدہ شاپنگ کمپلیکس میں انہیں عارضی طور پر منتقل کرنے پر غور کیا جا سکتا ہے۔
عمرعبداللہ نے محکمہ تعمیراتِ عامہ (آر اینڈ بی) کو ہدایت دی کہ نالہ سکھ ناگ کے کنارے واقع میونسپل کمیٹی کے شاپنگ کمپلیکس اور دیگر سرکاری عمارتوں کا جامع ساختی حفاظتی آڈٹ کیا جائے۔ انہوں نے واضح کیا کہ جب تک متعلقہ حکام کسی عمارت کو محفوظ قرار نہ دیں، اس میں کسی بھی قسم کی تجارتی سرگرمی کی اجازت نہ دی جائے۔
بعد ازاں وزیر اعلیٰ نے نالہ سکھ ناگ پر سیلاب سے تباہ ہونے والے عارضی ڈائیورژن پل کی بحالی کے جاری کاموں کا معائنہ کیا اور متعلقہ محکموں کو ہدایت دی کہ تعمیراتی کام میں تیزی لا کر بیروہ اور بڈگام کے درمیان گاڑیوں کی آمدورفت جلد بحال کی جائے۔
عمرعبداللہ نے نالہ سکھ ناگ پر زیر تعمیر مرکزی موٹر ایبل پل کی پیش رفت کا بھی جائزہ لیا اور اس منصوبے کو معیاری تعمیراتی اصولوں کے مطابق مقررہ مدت میں مکمل کرنے پر زور دیا۔
وزیر اعلیٰ نے ضلعی انتظامیہ اور تمام متعلقہ محکموں کو ہدایت دی کہ حالیہ سیلاب سے متاثرہ سڑکوں، پلوں، بجلی، پینے کے پانی اور دیگر بنیادی عوامی سہولیات کی فوری بحالی کو یقینی بنایا جائے۔انہوں نے اس بات پر زور دیا کہ موجودہ موسمی صورتحال کے پیش نظر تمام محکمے مکمل طور پر ہائی الرٹ رہیں اور کسی بھی ہنگامی صورتحال میں فوری اور مؤثر کارروائی کریں۔
اس موقع پر ایم ایل اے بیروہ ڈاکٹر شفیع احمد وانی، ڈپٹی کمشنر بڈگام اطہر عامر خان اور ضلعی انتظامیہ و مختلف محکموں کے سینئر افسران بھی وزیر اعلیٰ کے ہمراہ موجود تھے۔
اس سے پہلے وزیر اعلیٰ عمر عبداللہ نے آج سول سیکریٹریٹ میں ایک اور اعلیٰ سطحی جائزہ اجلاس کی صدارت کرتے ہوئے جموں و کشمیر میں مسلسل بارشوں اور اچانک آنے والے سیلاب کے باعث پیدا ہونے والی صورتحال، بحالی کے کاموں، امدادی اقدامات اور مجموعی سیلابی تیاریوں کا تفصیلی جائزہ لیا۔
اتوار سے اب تک پونچھ، راجوری اور ڈوڈہ اضلاع میں اچانک آنے والے سیلاب اور لینڈ سلائیڈنگ کے مختلف واقعات میں کم از کم۲۳؍ افراد جاں بحق جبکہ سات افراد لاپتہ ہیں۔ مسلسل موسلا دھار بارشوں سے عوامی بنیادی ڈھانچے اور نجی املاک کو بڑے پیمانے پر نقصان پہنچا ہے، سڑکیں اور پل بہہ گئے ہیں جبکہ متعدد علاقوں میں بجلی اور پانی کی فراہمی متاثر ہوئی ہے۔
اجلاس کی صدارت کرتے ہوئے وزیر اعلیٰ نے غیر متوقع موسمی حالات کے باعث پیدا ہونے والی سیلاب جیسی صورتحال سے مؤثر انداز میں نمٹنے کے لیے ہر وقت مکمل تیاری برقرار رکھنے کی ضرورت پر زور دیا۔
عمرعبداللہ نے کہا کہ بار بار پیش آنے والے سیلاب نما حالات اس بات کے متقاضی ہیں کہ طویل مدتی سیلابی تحفظ کے اقدامات اختیار کیے جائیں اور مضبوط بنیادی ڈھانچہ تعمیر کیا جائے۔ انہوں نے متعلقہ محکموں کو ہدایت دی کہ جانی و مالی نقصان کو کم سے کم کرنے کے لیے تمام ضروری اقدامات کیے جائیں، بالخصوص پینے کے پانی اور بجلی کی فراہمی۲۴ گھنٹوں کے اندر بحال کی جائے، حساس مقامات کو ترجیح دی جائے اور لاپتہ افراد کی تلاش و بازیابی کی کارروائیوں میں مزید تیزی لائی جائے۔
وزیر اعلیٰ نے کشمیر اور جموں کے ڈویژنل کمشنروں کو ہدایت دی کہ وہ فوری طور پر سیلابی صورتحال کا جائزہ لے کر سب سے زیادہ متاثرہ اضلاع کی نشاندہی کریں۔ انہوں نے مزید ہدایت دی کہ۲۰۲۵۔۲۶ کے دوران اختیار کیے گئے طریقہ کار کے مطابق ان اضلاع کے ڈپٹی کمشنروں کو فوری راحت، بازآبادکاری اور تباہ شدہ بنیادی ڈھانچے کی بحالی کے لیے مناسب فنڈز فراہم کیے جائیں۔
عمرعبداللہ نے پونچھ اور راجوری میں جاری امدادی اور ریسکیو کارروائیوں کا بھی جائزہ لیا اور ضلعی انتظامیہ کو ہدایت دی کہ تمام ریلیف کیمپوں میں متاثرہ افراد کے لیے خوراک، پینے کے صاف پانی اور طبی سہولیات کی مناسب فراہمی یقینی بنائی جائے۔
اجلاس کو بتایا گیا کہ اچانک آنے والے سیلاب کے فوراً بعد سول انتظامیہ، پولیس، ایس ڈی آر ایف، این ڈی آر ایف، فوج، بی آر او اور دیگر متعلقہ محکموں نے مشترکہ طور پر ریسکیو اور امدادی کارروائیاں شروع کیں، جو متاثرہ علاقوں میں بدستور جاری ہیں۔
وزیر اعلیٰ نے متعلقہ افسران کو ہدایت دی کہ پونچھ اور راجوری جیسے زیادہ متاثرہ اضلاع میں بجلی کی بحالی کے لیے کوششیں مزید تیز کی جائیں، کیونکہ پینے کے پانی کی فراہمی کی بحالی کا انحصار بڑی حد تک بجلی کی بحالی پر ہے۔ انہوں نے محکمہ بجلی کو مقررہ مدت میں بحالی کا کام مکمل کرنے اور باقی تمام مسائل فوری طور پر حل کرنے کی ہدایت دی تاکہ عوامی خدمات، خصوصاً پانی کی فراہمی، جلد از جلد مکمل طور پر بحال ہو سکے۔
عمرعبداللہ نے ضلع وار امدادی رقوم کی تقسیم اور نقصانات کے تخمینے کا بھی جائزہ لیا اور ڈپٹی کمشنروں کو ہدایت دی کہ تمام متاثرہ خاندانوں کو مقررہ قواعد کے مطابق بروقت مالی امداد فراہم کی جائے۔
وزیر اعلیٰ نے مکانات، مویشیوں، عوامی بنیادی ڈھانچے اور زرعی اراضی کو پہنچنے والے نقصانات کا بھی جائزہ لیا اور متعلقہ محکموں کو ہدایت دی کہ نقصانات کے تخمینے، بحالی اور معاوضے کی ادائیگی کے عمل میں کسی قسم کی تاخیر نہ کی جائے۔
اجلاس میں جموں اور کشمیر کے ڈویژنل کمشنروں نے اپنے اپنے علاقوں میں سیلابی تیاریوں اور امدادی اقدامات پر تفصیلی پریزنٹیشن پیش کی۔
وزیر اعلیٰ کو بتایا گیا کہ کشمیر ڈویژن میں سیلابی صورتحال سے نمٹنے کے لیے جامع منصوبہ بندی کی گئی ہے اور تمام ڈپٹی کمشنرز، ضلعی انتظامیہ اور متعلقہ محکموں کو ہائی الرٹ پر رکھا گیا ہے۔ ریسکیو ٹیمیں، انخلا مراکز، ہنگامی آلات اور ضروری خدمات پہلے سے ہی تعینات کر دی گئی ہیں تاکہ کسی بھی ممکنہ صورتحال میں فوری اور مربوط کارروائی کی جا سکے۔
اجلاس کو بتایا گیا کہ وادی میں۶۵۴ حساس دیہات کی نشاندہی کی گئی ہے، جہاں تقریباً۷ لاکھ۲۲ ہزار افراد خطرے سے دوچار ہیں۔ احتیاطی اقدام کے طور پر ان حساس علاقوں سے۱۵۰۵؍افراد کو پہلے ہی نامزد ریسکیو مراکز میں منتقل کیا جا چکا ہے، جبکہ دیگر حساس علاقوں کے لیے بھی انخلا کے منصوبے تیار رکھے گئے ہیں۔
حکام نے بتایا کہ۷۴۴ ریسکیو مراکز، ایس ڈی آر ایف کی۱۰۸ کشتیاں، فوج کی۲۵ کشتیاں‘۹۸سیٹلائٹ فون‘۱۰۲ ہیلی پیڈز اور ہنگامی ردعمل کے لیے مناسب فنڈز پہلے سے دستیاب رکھے گئے ہیں تاکہ امدادی کارروائیوں کو مزید مؤثر بنایا جا سکے۔
اجلاس کو یہ بھی بتایا گیا کہ ڈسٹرکٹ ایمرجنسی آپریشن سینٹرز اور اسٹیٹ ایمرجنسی آپریشن سینٹر چوبیس گھنٹے فعال ہیں اور مسلسل صورتحال کی نگرانی کرتے ہوئے امدادی کارروائیوں میں رابطہ کاری انجام دے رہے ہیں۔
مزید بتایا گیا کہ دریائے جہلم میں پانی کی سطح تمام مانیٹرنگ مقامات پر اب بھی وارننگ لیول سے کافی نیچے ہے، جبکہ محکمہ آبپاشی و فلڈ کنٹرول کی ٹیمیں دریاؤں اور فلڈ چینلوں کی مسلسل نگرانی کر رہی ہیں۔ صحت، پینے کے پانی اور ٹیلی مواصلات سمیت تمام بنیادی خدمات معمول کے مطابق جاری ہیں اور کسی بھی ہنگامی صورتحال سے نمٹنے کے لیے متبادل انتظامات بھی موجود ہیں۔
جموں ڈویژن میں سیلابی تیاریوں کے حوالے سے ڈویژنل کمشنر جموں نے بتایا کہ خراب موسمی حالات اور اچانک آنے والے سیلاب سے نمٹنے کے لیے تمام اضلاع میں جامع تیاریاں مکمل کر لی گئی ہیں۔ ضلعی انتظامیہ نے۲۴ گھنٹے فعال ایمرجنسی آپریشن سینٹرز قائم کیے ہیں، ہنگامی اور سیلابی ردعمل کے منصوبے نافذ ہیں اور موسم سے متعلق انتباہات باقاعدگی سے جاری کیے جا رہے ہیں۔
انہوں نے مزید بتایا کہ جموں ڈویژن میں۳۶۳ حساس مقامات کی نشاندہی کی گئی ہے‘۱۴۲ فرضی مشقیں (موک ڈرلز) منعقد کی جا چکی ہیں اور۱۳۸ فعال ہیلی پیڈز ہنگامی کارروائیوں کے لیے مختص کیے گئے ہیں۔ اس کے علاوہ ایس ڈی آر ایف فنڈز، تربیت یافتہ رضاکار اور ہنگامی آلات بھی پوری طرح تیار رکھے گئے ہیں۔
اجلاس کو بتایا گیا کہ بحالی کے لیے ضروری مشینری پہلے ہی حساس مقامات پر تعینات کر دی گئی ہے جبکہ ضلعی انتظامیہ اور تمام متعلقہ محکمے کسی بھی ہنگامی صورتحال سے نمٹنے کے لیے مکمل طور پر چوکس ہیں۔
