جموں،سری نگر شاہراہ پر لینڈ سلائیڈنگ‘ مزید شدید بارشوں کی وارننگ
ایجنسیاں
سرینگر؍۲۱ جولائی
جموں و کشمیر میں مسلسل موسلادھار بارشوں نے معمولِ زندگی کو بری طرح متاثر کر دیا ہے۔ وسطی کشمیر کے بیروہ قصبے میں سیلابی پانی میونسپل شاپنگ کمپلیکس کو بہا لے گیا، جبکہ گاندربل میں فلیش فلڈ سے رہائشی علاقوں اور زرعی اراضی کو نقصان پہنچا۔
ادھر جموں سری نگر قومی شاہراہ پر متعدد مقامات پر لینڈ سلائیڈنگ کے باعث ٹریفک متاثر ہوئی، جبکہ پونچھ میں فوج نے فوری کارروائی کرتے ہوئے شاہراہ بحال کرنے اور ایک اہم پل کی مرمت کا کام انجام دیا۔
سرکاری ذرائع کے مطابق منگل کو بیروہ کے مرکزی بس اسٹینڈ کے اطراف اچانک سیلابی پانی داخل ہونے سے میونسپل شاپنگ کمپلیکس بہہ گیا۔ پانی کی سطح اچانک بلند ہونے سے دکانداروں میں افراتفری مچ گئی اور وہ اپنی دکانوں سے سامان اور قیمتی اشیا محفوظ مقامات پر منتقل کرنے کی کوشش کرتے رہے۔
سیلابی ریلے سے علاقے کے حفاظتی بندوں کو بھی شدید نقصان پہنچا، جس کے باعث مقامی لوگوں میں مزید کٹاؤ اور سیلاب کے خدشات بڑھ گئے ہیں۔ مقامی تاجروں اور رہائشیوں نے انتظامیہ سے فوری طور پر فلڈ پروٹیکشن ڈھانچے کو مضبوط بنانے اور متاثرین کو فوری امداد فراہم کرنے کا مطالبہ کیا ہے۔
دریں اثنا ضلع گاندربل کے صفاپورہ علاقے میں شدید بارش اور بالائی علاقوں میں مبینہ کلاؤڈ برسٹ کے باعث مقامی ندی نالوں میں طغیانی آ گئی، جس سے کئی رہائشی علاقے اور زرعی زمین زیر آب آ گئی۔
مقامی افراد کے مطابق فلیش فلڈ کا پانی متعدد گھروں میں داخل ہوگیا اور کھڑی فصلوں سمیت وسیع زرعی اراضی کو نقصان پہنچا۔ مقامی سماجی کارکن محمد صدیق نے الزام لگایا کہ علاقے میں غیر قانونی طور پر مٹی نکالنے کے باعث قدرتی نکاسیٔ آب کا نظام متاثر ہوا، جس سے سیلاب کی شدت میں اضافہ ہوا۔ انہوں نے اس عمل پر فوری پابندی عائد کرنے کا مطالبہ کیا۔
ادھر پونچھ ضلع میں بھارتی فوج نے دو فوری کارروائیاں انجام دیتے ہوئے جموں-پونچھ قومی شاہراہ پر ٹریفک بحال کی اور دور افتادہ دیہات کو جوڑنے والے ایک اہم پل کی مرمت کی۔
دفاعی ترجمان کے مطابق جارن والی گلی میں پی ایم شری جواہر نوودیہ ودیالیہ کی حفاظتی دیوار کئی گاڑیوں پر گر گئی تھی، جس سے شاہراہ پر آمدورفت متاثر ہوئی۔ وائٹ نائٹ کور کے اہلکار فوری طور پر موقع پر پہنچے، ملبہ ہٹایا، پھنسے ہوئے گاڑیوں کو نکالا اور مقامی لوگوں کی مدد کی۔
دوسری جانب مسلسل بارشوں کے باعث جموں سری نگر قومی شاہراہ پر ادھم پور اور رام بن اضلاع میں متعدد مقامات، خصوصاً شاردا ماتا مندر اور تھارا کے نزدیک لینڈ سلائیڈنگ، مٹی کے تودے گرنے اور پتھر کھسکنے کے واقعات پیش آئے، جس سے ٹریفک کی روانی متاثر ہوئی۔
قومی شاہراہ اتھارٹی (این ایچ اے آئی)، ٹریفک پولیس اور دیگر متعلقہ اداروں کی ٹیمیں ملبہ ہٹانے اور ٹریفک بحال کرنے میں مصروف ہیں، جبکہ مسافروں کو سفر سے قبل تازہ ٹریفک ایڈوائزری معلوم کرنے کا مشورہ دیا گیا ہے۔
اسی دوران راجوری کے نوگراٹہ سالدھار علاقے میں بھی لینڈ سلائیڈنگ کا واقعہ پیش آیا، جس سے مقامی رابطہ سڑک متاثر ہوئی، تاہم کسی جانی نقصان کی اطلاع نہیں ملی۔
محکمہ موسمیات نے جموں خطے کے جموں، ریاسی، ادھم پور، پونچھ، راجوری، سانبہ، کٹھوعہ، ڈوڈہ، کشتواڑ اور رام بن اضلاع کے لیے انتہائی شدید بارش کی وارننگ جاری کرتے ہوئے گرج چمک، فلیش فلڈ اور لینڈ سلائیڈنگ کے خدشے کا اظہار کیا ہے۔
محکمہ نے ندی نالوں، پہاڑی ڈھلوانوں اور سیلاب کے خطرے والے علاقوں میں رہنے والے لوگوں کو انتہائی محتاط رہنے اور انتظامیہ کی جانب سے جاری کردہ ہدایات پر سختی سے عمل کرنے کی ہدایت دی ہے، جبکہ ضلعی انتظامیہ نے بتایا کہ ایمرجنسی ٹیموں کو الرٹ رکھا گیا ہے اور وسطی کشمیر میں دریاؤں اور معاون ندیوں میں پانی کی سطح پر مسلسل نظر رکھی جا رہی ہے۔
