ایجنسیاں
سرینگر؍۲۱ جولائی
جموں کشمیر کے ضلع اننت ناگ میں جاری سالانہ امرناتھ یاترا کے دوران نصب فیشل ریکگنیشن سسٹم (چہرہ شناختی نظام) کی مدد سے غیر قانونی سرگرمیوں کی روک تھام ایکٹ (یو اے پی اے) کے ایک ملزم کو گرفتار کر لیا گیا۔ پولیس نے منگل کو یہ اطلاع دی۔
پولیس کے ایک ترجمان نے بتایا کہ امرناتھ یاترا کے لیے کیے گئے سخت سیکورٹی انتظامات کے تحت اس سے قبل بھی فیشل ریکگنیشن سسٹم کی مدد سے۱۱ جولائی کو ایک اوور گراؤنڈ ورکر (او جی ڈبلیو) اور۸جولائی کو تین دیگر افراد کو گرفتار کیا گیا تھا۔
ترجمان کے مطابق گرفتار شخص کی شناخت دانش امین ریشی ولد/ساکن ویرسرن کے طور پر ہوئی ہے۔انہوں نے بتایا کہ معمول کی جانچ کے دوران فیشل ریکگنیشن سسٹم نے ایک الرٹ جاری کیا، جس سے معلوم ہوا کہ مذکورہ شخص ایک سابقہ مجرمانہ مقدمے میں مطلوب ہے۔
مزید تصدیق کے بعد معلوم ہوا کہ دانش امین ریشی کے خلاف پولیس اسٹیشن پہلگام میں غیر قانونی سرگرمیوں کی روک تھام ایکٹ (یو اے پی اے) کے تحت مقدمہ درج ہے۔
پولیس نے ملزم کو فوری طور پر حراست میں لے کر قانون کے مطابق مزید کارروائی شروع کر دی ہے۔
ترجمان نے کہا کہ اننت ناگ پولیس امرناتھ یاترا کے لیے قائم کثیر سطحی سیکورٹی نظام کے تحت فیشل ریکگنیشن سسٹم سمیت جدید تکنیکی ذرائع کا مؤثر استعمال جاری رکھے ہوئے ہے۔
۔۔۔۔۔۔۔۔۔۔۔۔۔۔۔۔
