ایجنسیز
راجوری؍۶جون
ضلع راجوری کے منج کوٹ سیکٹر کے گمبھیر مغلاں اور دوری مال کے گھنے جنگلات میں بھارتی فوج، جموں و کشمیر پولیس اور سی آر پی ایف کی مشترکہ انسدادِ دہشت گردی کارروائی چودھویں روز میں داخل ہو گئی ہے۔ سکیورٹی فورسز علاقے میں مبینہ طور پر چھپے دہشت گردوں کا سراغ لگانے میں مصروف ہیں۔
سکیورٹی اہلکاروں کو علاقے میں مسافروں اور مقامی باشندوں کے شناختی کارڈ چیک کرتے ہوئے اور وسیع پیمانے پر تلاشی کارروائیاں انجام دیتے ہوئے دیکھا گیا۔
’’آپریشن شیروالی‘‘ کے نام سے جاری اس کارروائی کا آغاز ان خفیہ اطلاعات کے بعد کیا گیا تھا جن میں علاقے میں مشتبہ دہشت گردوں کی موجودگی کی نشاندہی کی گئی تھی۔
حکام کے مطابق اس کارروائی کا مقصد مشتبہ افراد کو مخصوص علاقوں تک محدود رکھنا اور تلاشی ٹیموں کو مزید مؤثر انداز میں کارروائی کرنے کا موقع فراہم کرنا ہے۔
انہوں نے کہا کہ سکیورٹی فورسز مسلسل علاقے کی نگرانی کر رہی ہیں اور دہشت گردوں کی تلاش کے لیے سرچ آپریشن میں شدت لائی جا رہی ہے۔(ایجنسیاں)
