ڈوڈہ/شوپیاں؍۵ جون
جموں و کشمیر کے ضلع ڈوڈہ کے بھدرواہ علاقے اور جنوبی کشمیر کے ضلع شوپیاں میں جمعہ کو پیش آنے والے دو الگ الگ سڑک حادثات میں کم از کم۱۰؍افراد زخمی ہو گئے۔
حکام کے مطابق بھدرواہ کے نلتھی پارک کے نزدیک ایک کار بے قابو ہو کر سڑک سے پھسل گئی اور قلابازیاں کھاتے ہوئے دریا میں جا گری، جس کے نتیجے میں چار افراد زخمی ہو گئے۔
اطلاعات کے مطابق حادثہ اس وقت پیش آیا جب ڈرائیور گاڑی پر قابو کھو بیٹھا، جس کے باعث گاڑی سڑک سے نیچے دریا میں جا گری۔
حادثے کی اطلاع ملتے ہی امدادی ٹیمیں موقع پر پہنچ گئیں اور زخمیوں کو فوری طور پر سب ڈسٹرکٹ اسپتال بھدرواہ منتقل کیا گیا۔
زخمیوں کی شناخت پنجاب کے ضلع پٹھانکوٹ کے رہائشی اشونی کمار‘ نوینیت شرما‘اجے کمار ؍ اور امرجیت سنگھ کے طور پر کی گئی ہے۔
پولیس نے واقعے کا نوٹس لیتے ہوئے حادثے کی وجوہات جاننے کے لیے تحقیقات شروع کر دی ہیں۔
ادھر جنوبی کشمیر کے ضلع شوپیاں کے ہیرپورہ علاقے کے دوبجن مقام پر ایک کار سڑک سے پھسل کر گہری کھائی میں جا گری، جس کے نتیجے میں چھ افراد زخمی ہو گئے۔
حکام نے بتایا کہ حادثے کا شکار ہونے والی سوئفٹ کار راجوری سے شوپیاں کی طرف جا رہی تھی۔گاڑی کو سنیل شرما ولد رمیش شرما چلا رہے تھے۔ ابتدائی اطلاعات کے مطابق ڈرائیور گاڑی پر قابو نہ رکھ سکا جس کے باعث گاڑی سڑک سے نیچے جا گری۔
حادثے میں ڈرائیور سمیت پانچ دیگر مسافر زخمی ہوئے جن کی شناخت راجیش کمار ولد رمیش کمار، پلاوی چندن زوجہ راجیش کمار، آراو کمار ولد راجیش کمار، پراچی دختر راجیش کمار اور دعا کمار ولد وجے کمار کے طور پر کی گئی ہے۔
تمام زخمیوں کو علاج و معالجے کے لیے ضلع اسپتال منتقل کر دیا گیا ہے۔پولیس نے دونوں حادثات کے سلسلے میں مقدمات درج کرکے تحقیقات شروع کر دی ہے۔
