ایجنسیز
سرینگر؍۵جون
جموں و کشمیر کے لیفٹیننٹ گورنر منوج سنہا اور وزیر اعلیٰ عمر عبداللہ نے عالمی یومِ ماحولیات کے موقع پر ماحولیات کے تحفظ کے لیے اجتماعی کوششوں کی ضرورت پر زور دیتے ہوئے کہا ہے کہ آنے والی نسلوں کے لیے ایک صحت مند اور محفوظ سیارہ یقینی بنانا ہم سب کی مشترکہ ذمہ داری ہے۔
عالمی یومِ ماحولیات کے موقع پر اپنے پیغام میں لیفٹیننٹ گورنر منوج سنہا نے کہا کہ ہمیں مادرِ ارض کے تحفظ اور فطرت کے نازک توازن کو برقرار رکھنے کے عزم کی تجدید کرنی چاہیے۔
انہوں نے کہا، ’’عالمی یومِ ماحولیات کے موقع پر آئیے ہم مادرِ ارض کے تحفظ اور فطرت کے نازک توازن کو برقرار رکھنے کے اپنے عزم کو مزید مضبوط کریں۔ ماحولیات کے تحفظ کے لیے ہماری اجتماعی کوششیں انسانیت کی فلاح و بہبود اور آنے والی نسلوں کے لیے ایک صحت مند سیارے کی ضمانت ہیں۔‘‘
دریں اثنا، وزیر اعلیٰ عمر عبداللہ نے اپنے پیغام میں کہا کہ ان کی حکومت ماحولیاتی تحفظ اور پائیدار ترقی کے لیے پوری طرح پُرعزم ہے اور انہوں نے ہر شہری سے اس قومی و اجتماعی مشن میں حصہ لینے کی اپیل کی۔
وزیر اعلیٰ کے دفتر کی جانب سے سوشل میڈیا پلیٹ فارم ایکس پر جاری بیان میں کہا گیا، ’’عالمی یومِ ماحولیات کے موقع پر وزیر اعلیٰ نے ماحولیاتی تحفظ اور پائیدار ترقی کے لیے حکومت کے عزم کا اعادہ کیا اور عوام سے اپیل کی کہ وہ ماحول دوست اقدامات کو فروغ دینے اور قدرتی وسائل کے تحفظ کے لیے اپنی ذمہ داریاں ادا کریں۔‘‘(ایجنسیاں)
