ایجنسیز
گاندربل؍۴ جون
آنے والی شری امرناتھ جی یاتراکی تیاریوں کے سلسلے میں انسپکٹر جنرل آف پولیس (آئی جی پی) کشمیر، وی کے بردی نے جمعرات کو ضلع گاندربل کے بالتل بیس کیمپ کا دورہ کرکے سکیورٹی اور انتظامی تیاریوں کا تفصیلی جائزہ لیا۔
دورے کے دوران آئی جی پی کے ہمراہ راجیو پانڈے اور سدھانشو دھاما بھی موجود تھے۔
افسران نے جموں و کشمیر پولیس اور یاترا ڈیوٹی پر تعینات مرکزی مسلح پولیس فورسز (سی اے پی ایف) کے اہلکاروں کے لیے قائم مختلف سہولیات کا معائنہ کیا۔
معائنے کے دوران سکیورٹی ڈھانچے، رہائشی سہولیات، مواصلاتی نظام اور دیگر ضروری انتظامات کا جائزہ لیا گیا تاکہ سالانہ یاترا کے پرامن، محفوظ اور منظم انعقاد کو یقینی بنایا جا سکے۔
آئی جی پی نے تمام متعلقہ اداروں کے درمیان باہمی رابطے اور ہم آہنگی کی اہمیت پر زور دیتے ہوئے متعلقہ افسران کو ہدایت دی کہ وہ مکمل چوکسی اور تیاری کو یقینی بنائیں اور یاترا کے آغاز سے قبل تمام ضروری انتظامات مکمل کر لیں۔
بردی نے اس عزم کا اعادہ کیا کہ پولیس اور دیگر سکیورٹی ایجنسیاں شری امرناتھ جی یاترا پر آنے والے عقیدت مندوں کو محفوظ، پُرسکون اور ہر ممکن سہولت سے آراستہ ماحول فراہم کرنے کے لیے پُرعزم ہیں۔
گاندربل پولیس کے مطابق سالانہ یاترا، جو خطے کی اہم ترین مذہبی تقریبات میں شمار ہوتی ہے، کے پُرامن اور کامیاب انعقاد کو یقینی بنانے کے لیے تمام ضروری اقدامات کیے جا رہے ہیں اور سکیورٹی کے مؤثر انتظامات کو حتمی شکل دی جا رہی ہے۔
