ایجنسیز
سرینگر؍۹مئی
سری نگر انٹرنیشنل ایئرپورٹ پر چنئی سے آنے والے ایک مسافر کے قبضے سے تقریباً۱۵ لاکھ روپے نقد برآمد کیے گئے، جنہیں انکم ٹیکس یونٹ نے جانچ کے دوران ضبط کر لیا۔ حکام نے یہ جانکاری ہفتہ کو دی۔
مسافر دہلی کے راستے سری نگر پہنچا تھا۔ اس نے چنئی سے دہلی کے لیے فلائٹ اے آئی۲۸۳۲کے ذریعے سفر کیا اور بعد میں دہلی سے سری نگر کے لیے فلائٹ اے آئی۱۷۳۹ میں سوار ہوا۔
حکام کے مطابق سری نگر انٹرنیشنل ایئرپورٹ پر تعینات انکم ٹیکس یونٹ کی جانب سے معمول کی چیکنگ کے دوران نقد رقم کا پتہ چلا۔
پوچھ گچھ کے دوران مسافر نے حکام کو بتایا کہ وہ گزشتہ۴۰برس سے چنئی میں دستکاری کے کاروبار سے وابستہ ہے۔
اس نے مزید کہا کہ یہ رقم اس کے خاندان میں ایک شادی کی تقریب کے اخراجات کے لیے لائی جا رہی تھی۔بعد ازاں متعلقہ حکام نے رقم کو تصدیق اور مزید قانونی کارروائی کے لیے ضبط کر لیا۔
حکام نے بتایا کہ مسافر کو ہدایت دی گئی ہے کہ وہ اس معاملے میں مزید کارروائی کے لیے پیر کے روز سمندر باغ، سری نگر میں واقع انکم ٹیکس دفتر میں پیش ہو۔
