اعلیٰ سطحی میٹنگ میں سیلاب اور لو کی صورتحال سے نمٹنے کی تیاریوں کا جائزہ لیں گے شاہ

نئی دہلی، 08 مئی (یو این آئی) مرکزی وزیر داخلہ امت شاہ اتوار کو یہاں ایک اعلیٰ سطحی میٹنگ کی صدارت کریں گے، جس میں ملک میں ممکنہ سیلاب اور لو (ہیٹ ویو) کی صورتحال سے نمٹنے کی تیاریوں کا جامع جائزہ لیا جائے گا۔ حکومت کے آفات کے انتظام کے لیے اپنائے گئے فعال اور فیصلہ کن ‘مکمل حکومت’ اور ‘مکمل معاشرہ’ کے نقطہ نظر کی سمت میں یہ میٹنگ خاص طور پر اہم ہے۔ وزارتِ داخلہ نے حالیہ برسوں میں ملک میں آفات کے انتظام کے ڈھانچے کو کافی مضبوط کیا ہے۔ اس میں مرکز اور ریاستی حکومت کی ایجنسیوں کے درمیان بہتر تال میل، این ڈی آر ایف کو مستحکم بنانا اور قدرتی آفات کے دوران صفر جانی نقصان کے نقطہ نظر پر مسلسل توجہ مرکوز کرنا شامل ہے۔
یہ اعلیٰ سطحی جائزہ حکومت کی فعال حکمرانی، شہریوں کے تحفظ پر مبنی آفات کے انتظام اور آفات سے محفوظ ہندوستان کی تعمیر کے تئیں غیر متزلزل عزم کی عکاسی کرتا ہے۔ میٹنگ کے دوران وزیر داخلہ مرکزی حکومت کی ایجنسیوں کی تیاریوں کا تخمینہ لگائیں گے، ساتھ ہی اس بات کو یقینی بنانے کے لیے کہ کوئی جانی نقصان نہ ہو اور املاک کو کم سے کم نقصان پہنچے، قبل از وقت وارننگ کے نظام، وسائل کی تعیناتی اور مختلف ایجنسیوں کے درمیان تال میل کا جائزہ لیں گے۔
مرکزی وزیر داخلہ ملک میں سیلاب کے اثرات کو کم کرنے کے لیے کیے جا رہے طویل مدتی اقدامات کی پیشرفت کا بھی جائزہ لیں گے۔ ان اقدامات میں اہم بنیادی ڈھانچے کے منصوبوں کی حفاظت، دریاؤں کے انتظام کے اقدامات اور موسم کی پیشن گوئی میں سائنسی ترقی شامل ہے۔ اس کے علاوہ، وہ گزشتہ برس منعقدہ جائزہ میٹنگ میں کیئے گئے فیصلوں کے نفاذ کی بھی معلومات لیں گے، تاکہ جوابدہی کو یقینی بنایا جا سکے اور مختلف سرگرمیوں کی فوری اور مربوط تکمیل ہو سکے۔
اعلیٰ سطحی میٹنگ میں بنیادی طور پر جدید ٹیکنالوجی اور حقیقی ڈیٹا انٹیگریشن کے ذریعے سیلاب کی پیش گوئی اور قبل پیشگی وارننگ کے نظام کو مضبوط بنانے، ایک ساتھ آنے والی آفات، خاص طور پر سیلاب اور لو جیسے چیلنجوں سے نمٹنے کی تیاریوں میں اضافہ کرنے، جانی و مالی نقصان کو روکنے کے لیے عوامی بیداری کے پروگرام چلانے، ضروری امدادی سامان کا مناسب ذخیرہ اور طبی تیاریوں کو یقینی بنانے پر بحث کی جائے گی۔