ہندوستان-ویتنام اسٹریٹجک پارٹنرشپ ہوگی مزید مستحکم، باہمی تعاون سے دونوں بنیں گے ترقی یافتہ ممالک: مودی

نئی دہلی، 06 مئی (یو این آئی) وزیراعظم نریندر مودی نے کہا ہے کہ ہندوستان اور ویتنام نے اپنی ہمہ جہت اسٹریٹجک پارٹنرشپ کو مزید مستحکم بنانے کا فیصلہ کیا ہے اور دونوں ممالک ایک دوسرے کے وژن اور اہداف میں تعاون کرتے ہوئے، ترقی یافتہ قوم بننے کی اپنی خواہشات کو مل کر پورا کریں گے۔
مسٹر مودی نے ہندوستان کے دورے پر آئے ویتنام کے صدر تو لام کے ساتھ بدھ کو یہاں دو طرفہ بات چیت میں باہمی تعلقات کے تمام پہلوؤں پر تفصیلی گفتگو کی۔ اس کے بعد مسٹر مودی نے مشترکہ بیان میں کہا کہ مسٹر تو لام نے اپنے دورہ ہند کا آغاز بودھ گیا سے کیا ہے، جو دونوں ممالک کی مشترکہ تہذیبی اور روحانی روایت کی عکاسی کرتا ہے۔ انہوں نے کہا کہ اس دورے اور بامقصد بات چیت سے ہم اپنی خیر سگالی کو کئی ٹھوس نتائج میں بدل رہے ہیں۔
وزیراعظم نے کہا کہ دونوں ممالک کے درمیان ایک دہائی سے ہمہ جہت اسٹریٹجک پارٹنرشپ قائم ہے اور اس دوران تعلقات میں وسیع تر ترقی ہوئی ہے۔ دونوں ممالک کے درمیان تجارت، ٹیکنالوجی اور سیاحت کے تعلقات مضبوط ہوئے ہیں۔ اس مضبوط بنیاد پر آگے بڑھتے ہوئے آج ہم اپنے تعلقات کو مزید مضبوط ہمہ جہت اسٹریٹجک پارٹنرشپ کی سطح پر لے جا رہے ہیں۔ اب ہم اپنی شراکت داری کو مزید بلند اہداف کی طرف لے جائیں گے۔ ثقافت، رابطے، صلاحیت سازی کے ساتھ ساتھ سکیورٹی، پائیداری اور مضبوط سپلائی چین جیسے ہر شعبے میں ہمارا تعاون نئی بلندیوں تک پہنچے گا۔ انہوں نے مزید کہا کہ عالمی اتھل پتھل اور اقتصادی چیلنجوں کے اس دور میں اپنی صلاحیت، گڈ گورننس اور اقتصادی اصلاحات کے بل پر ہندوستان اور ویتنام دنیا کی تیزی سے بڑھتی ہوئی معیشتوں کے طور پر ابھر رہے ہیں۔ اب ہماری گہری اسٹریٹجک پارٹنرشپ کے ذریعے ہم ایک دوسرے کی تیز رفتار ترقی میں معاون بنیں گے۔
مسٹر مودی نے کہا کہ دونوں ممالک نے ترقی یافتہ قوم بننے کے سفر میں باہمی تعاون پر اتفاق کیا ہے اور یہ بدھ کی تعلیمات کے جذبے پر مبنی ہے۔ انہوں نے کہا کہ جیسا کہ بدھ کی تعلیمات کا جذبہ ہے کہ اگر آپ کسی اور کے لیے چراغ جلاتے ہیں، تو وہ آپ کے اپنے راستے کو بھی روشن کرتا ہے۔ اسی جذبے کے ساتھ ہم ایک دوسرے کے وژن اور اہداف میں تعاون کرتے ہوئے ترقی یافتہ قوم بننے کی اپنی خواہشات کو مل کر شرمندہ تعبیر کریں گے۔ ہم ساتھ چلیں گے، ساتھ بڑھیں گے اور ساتھ جیتیں گے۔