ایجنسیز
سرینگر؍۶مئی
جموں و کشمیر پولیس نے اننت ناگ کے رکن اسمبلی پیرزادہ محمد سید کی اہلیہ اور بیٹے کے خلاف مبینہ طور پر ایک سرکاری اسپتال کو تالا لگانے کے الزام میں مقدمہ درج کیا ہے۔ حکام نے بدھ کے روز یہ جانکاری دی۔
حکام کے مطابق جنوبی کشمیر کے ضلع اننت ناگ کے اچھہ بل پولیس اسٹیشن میں منگل کے روز پیرزادہ محمد سید کی اہلیہ اور بیٹے کے خلاف ایف آئی آر درج کی گئی، کیونکہ انہوں نے مبینہ طور پر ضلع کے دمہال ہانجی پورہ علاقے میں واقع ایک طبی مرکز کو تالا لگا دیا تھا۔
بتایا جاتا ہے کہ جس عمارت میں یہ طبی مرکز قائم ہے وہ رکن اسمبلی کے خاندان کی ملکیت ہے اور اسے۲۰۰۸ میں ایک پرائمری ہیلتھ سینٹر قائم کرنے کے لیے فراہم کیا گیا تھا۔
تاہم، خاندان کا دعویٰ ہے کہ رواں سال کے اوائل میں رکن اسمبلی نے چیف میڈیکل آفیسر اننت ناگ کو ایک خط لکھ کر ہیلتھ سینٹر کو کسی دوسری جگہ منتقل کرنے کی درخواست کی تھی، یہ مؤقف اختیار کرتے ہوئے کہ عمارت خستہ حال ہو چکی ہے۔
