ایجنسیز
نئی دہلی؍۶مئی
امریکہ اور ایران کے درمیان ممکنہ معاہدے کی امیدوں کے درمیان قیمتی دھاتوں کی مانگ بڑھنے سے بدھ کے روز سونے اور چاندی کی قیمتوں میں نمایاں اضافہ درج کیا گیا۔
قومی دارالحکومت میں سونے کی قیمت میں۲۹۰۰ روپے کا اضافہ ہوا، جس کے بعد یہ۱۰گرام کے لیے ایک لاکھ ۵۵ہزارلاکھ روپے تک پہنچ گیا، جبکہ چاندی کی قیمت بڑھ کر۲لاکھ۵۴ہزار روپے فی کلوگرام ہو گئی۔
آل انڈیا صرافہ ایسوسی ایشن کے مطابق۹۹ء۹ فیصد خالص سونے کی قیمت میں۲۹۰۰روپے یعنی تقریباً۲ فیصد اضافہ ہوا اور یہ منگل کے اختتامی نرخ ایک لاکھ۵۲ہزار۵۰۰ روپے فی۱۰گرام سے بڑھ کرایک لاکھ۵۵ہزار۴۴۰ روپے فی۱۰گرام (تمام ٹیکس سمیت) ہو گئی۔
تاجروں کے مطابق قیمتی دھاتوں کی قیمتوں میں اس اضافے کی بڑی وجہ وہ اطلاعات ہیں جن میں کہا گیا ہے کہ واشنگٹن اور تہران کئی ماہ سے جاری کشیدگی کے خاتمے کے لیے ایک فریم ورک معاہدے کو حتمی شکل دینے کے قریب ہیں۔ اس پیش رفت سے آبنائے ہرمز کے ذریعے تیل کی روانی میں بہتری اور توانائی منڈیوں سے جڑی افراطِ زر کی تشویش میں کمی کی توقعات پیدا ہوئی ہیں۔
ایچ ڈی ایف سی سکیورٹیز کے سینئر تجزیہ کار برائے کموڈیٹیز، سومیِل گاندھی نے کہا’’بدھ کے روز سونے کی قیمتوں میں مضبوط تیزی دیکھی گئی کیونکہ جغرافیائی سیاسی کشیدگی میں نرمی کے باعث اُن اہم معاشی عوامل میں اچانک تبدیلی آئی جنہوں نے حالیہ دنوں میں قیمتی دھاتوں پر دباؤ ڈالا تھا۔‘‘
