’ ڈرگس سے پاک جموںکشمیر اجتماعی کوششوں سے وجود میں آئے گا‘
ایجنسیز
جموں؍۱۳؍اپریل
لیفٹیننٹ گورنر‘ منوج سنہا نے پیر کے روز کہا کہ منشیات سے پاک جموں و کشمیر کسی ایک فرد کی نہیں بلکہ اجتماعی کوششوں سے وجود میں آئے گا، کیونکہ منشیات نہ صرف افراد بلکہ پورے معاشرے کی عزت اور مستقبل کو تباہ کر دیتی ہیں۔
کٹھوعہ کے اسپورٹس اسٹیڈیم میں ایک بڑے عوامی اجتماع سے خطاب کرتے ہوئے انہوں نے نشہ مکت جموں و کشمیر مہم کے تحت منشیات کے خلاف عوامی تحریک کا آغاز کیا۔
لیفٹیننٹ گورنر نے اسپورٹس اسٹیڈیم سے گورنمنٹ ڈگری کالج کٹھوعہ تک پدیاترا کی قیادت کی، جس میں ہزاروں شہریوں، عوامی نمائندوں، سینئر افسران، سول سوسائٹی، سماجی کارکنوں، این جی اوز، خواتین، طلبہ اور دیگر افراد نے شرکت کی۔
سنہا نے ہر شہری اور ہر خاندان سے اپیل کی کہ وہ منشیات کے خلاف متحد ہو جائیں۔ انہوں نے کہا’’میں کٹھوعہ کے ہر پنچایت، ہر گلی اور ہر گھر سے منشیات کے خاتمے کے لیے عوامی انقلاب کا آغاز کر رہا ہوں، یہ کوئی خواب نہیں بلکہ میرا اٹل عہد ہے‘‘۔
ایل جی نے کہا کہ آئندہ تین ماہ اس تحریک کے لیے نہایت اہم ہوں گے اور اسی دوران ایک۱۰۰ روزہ منصوبہ پر عمل کیا جائے گا، جس کے تحت پہلے مہینے میں بیداری، دوسرے میں سماجی شمولیت اور تیسرے میں پائیداری پر توجہ دی جائے گی۔
لیفٹیننٹ گورنر نے کہا کہ اس مہم کا بنیادی نکتہ بحالی ہے اور ہمیں اپنا رویہ بدلنا ہوگا کیونکہ منشیات کے عادی افراد مجرم نہیں بلکہ مریض ہیں جنہیں مدد اور ہمدردی کی ضرورت ہے۔
سنہا نے مؤثر، قابل رسائی اور انسانی ہمدردی پر مبنی بحالی مراکز کے قیام پر زور دیتے ہوئے کہا کہ جہاں ضرورت ہو وہاں سخت کارروائی بھی کی جائے گی، خاص طور پر منشیات فروشوں اور جرائم پیشہ عناصر کے خلاف۔
ایل جی نے پولیس کو ہدایت دی کہ تمام تھانوں میں بڑے منشیات فروشوں کی فہرست تیار کر کے۳۰دن کے اندر ان کے نیٹ ورک کو ختم کیا جائے اور منشیات کے گٹھ جوڑ کے مکمل خاتمے کے لیے مربوط اور وقت بند حکمت عملی اپنائی جائے۔
سنہا نے خبردار کیا کہ منشیات کے کاروبار میں ملوث افراد کے خلاف سخت کارروائی کی جائے گی، جس میں پاسپورٹ، ڈرائیونگ لائسنس، آدھار کارڈ اور اسلحہ لائسنس کی منسوخی شامل ہوگی۔
ایل جی نے کہا کہ این ڈی پی ایس ایکٹ کے تحت منقولہ و غیر منقولہ جائیداد ضبط کی جائے گی، بینک اکاؤنٹس منجمد کیے جائیں گے اور مالیاتی تحقیقات بھی کی جائیں گی، تاکہ کوئی بھی مجرم قانون کی گرفت سے نہ بچ سکے۔
لیفٹیننٹ گورنر نے خواتین کے سیلف ہیلپ گروپس سے اپیل کی کہ وہ ویمن ویجیلنس اسکواڈ تشکیل دیں تاکہ منشیات کے استعمال پر نظر رکھی جا سکے اور حکام کو بروقت اطلاع دی جا سکے۔
ایل جی نے کہا کہ حکومت اور معاشرہ مل کر ہی منشیات کے خلاف جنگ جیت سکتے ہیں اور ہمیں نشہ سے پاک دیہات اور شہر قائم کرنے کے لیے اجتماعی کوششیں کرنی ہوں گی۔
اس موقع پر لیفٹیننٹ گورنر نے شرکاء سے انسدادِ منشیات کا حلف بھی لیا اور ’نشہ مکت جموں و کشمیر‘ ترانہ جاری کیا۔ تقریب میں ڈی آئی پی آر کی جانب سے آگاہی ویڈیوز، نکڑ ناٹک، ثقافتی پروگرام، گیت اور شاعری کے ذریعے بھی عوام کو منشیات کے خلاف بیدار کیا گیا۔
