ویب ڈیسک
سرینگر؍۱۹مارچ
ورلڈ ہیپی نیس رپورٹ۲۰۲۶کے مطابق بھارت نے عالمی درجہ بندی میں۱۱۶واں مقام حاصل کیا ہے، جو گزشتہ سال کے۱۱۸ویں نمبر کے مقابلے میں دو درجے بہتر ہے، تاہم یہ نیپال اور پاکستان سے پیچھے ہے۔
یہ رپورٹ ہر سال۲۰مارچ کے آس پاس، عالمی یومِ مسرت کے موقع پر جاری کی جاتی ہے اور اس میں۱۴۰سے زائد ممالک کے فلاح و بہبود سے متعلق اعداد و شمار کے ساتھ مختلف شعبوں کے ماہرین کی تحقیق شامل ہوتی ہے۔اس سال رپورٹ کا موضوع’خوشی اور سوشل میڈیا‘ رکھا گیا تھا۔
بھارت مجموعی طور پر۱۱۶ویں مقام پر رہا، جبکہ۲۰۲۴میں یہ۱۱۸ویں اور۲۰۲۳میں۱۲۶ویں نمبر پر تھا۔تاہم۲۰۲۶ میں بھارت نے کئی اشاریوں پر بہتر کارکردگی دکھائی۔
مثال کے طور پر بدعنوانی کے تاثر کے حوالے سے۶۴واں، فیاضی (خیرات دینے) میں۷۸واں، آزادی (انتخاب کی آزادی) میں۶۱واں، فی کس جی ڈی پی (خریداری قوت کے لحاظ سے) میں۸۹واں، صحت مند متوقع عمر میں۹۵ واں، جبکہ سماجی تعاون (مشکل وقت میں سہارا) کے معاملے میں۱۲۳واں مقام حاصل کیا۔
بھارت کے ہمسایہ ممالک میں افغانستان ایک بار پھر دنیا کا سب سے کم خوش ملک قرار پایا اور۱۴۷ویں نمبر پر رہا، جو۲۰۲۵ کی طرح برقرار ہے، جبکہ۲۰۲۳ میں اس کا درجہ۱۴۳تھا۔
دوسری جانب نیپال 99ویں (2025 میں 92، 2024 میں 93) اور پاکستان 104ویں (2025 میں 109، 2024 میں 108) مقام پر رہ کر بھارت سے آگے رہے۔ سری لنکا 134ویں (2025 میں بھی 134، 2024 میں 128) جبکہ بنگلہ دیش 127ویں (2025 میں بھی 127، 2024 میں 129) نمبر پر رہا۔
