جو بھی امن، قانون و نظم یا شہریوں کی سلامتی کو خطرے میں ڈالے گا، اسے ’بہت بھاری قیمت‘ چکانی پڑے گی:سنہا
ایل جی سنہا کی علیحدگی پسند عناصر کو وارننگ/’جموں کشمیر میں امن و ترقی میں رکاوٹ ڈالنے والوں کا خاتمہ کیا جائے گا ‘
جموں؍۱۷مارچ
جموں و کشمیر کے لیفٹیننٹ گورنر منوج سنہا نے منگل کو علیحدگی پسند عناصر کو سخت انتباہ دیتے ہوئے کہا کہ عوام کو تقسیم کرنے یا ترقی کے عمل کو متاثر کرنے کی کسی بھی کوشش سے سختی سے نمٹا جائے گا۔
سنہا نے کہا کہ جو بھی فرد یا گروہ جموں و کشمیر میں امن، قانون و نظم یا شہریوں کی سلامتی کو خطرے میں ڈالے گا، اسے ’بہت بھاری قیمت‘ چکانی پڑے گی۔
سبسڈری پولیس ٹریننگ سینٹر تلوارہ میں کانسٹیبلوں کی پاسنگ آؤٹ پریڈ سے خطاب کرتے ہوئے انہوں نے کہا’’ہمیں ان علیحدگی پسند عناصر کا جڑ سے خاتمہ کرنا ہوگا جو لوگوں کو تقسیم کرنے اور ترقی کو پٹری سے اتارنے کی کوشش کر رہے ہیں۔ یہ ان کے لیے ایک سخت وارننگ ہے‘‘۔
لیفٹیننٹ گورنر نے کہا کہ امن کو خراب کرنے، تجارتی سرگرمیوں کو متاثر کرنے یا تشدد کو ہوا دینے کی کسی بھی کوشش کا قانون کی پوری طاقت سے جواب دیا جائے گا، اور جموں و کشمیر پولیس نظم و نسق اور استحکام کے تحفظ کے لیے ہر ممکن اقدام کرے گی۔
سنہا نے تربیت مکمل کرنے والے پولیس جوانوں کو مبارکباد دیتے ہوئے کہا کہ جموں و کشمیر پولیس نے ایک دہشت گردی اور جرائم سے پاک معاشرے کے قیام میں اہم کردار ادا کیا ہے، جہاں شہریوں کو عدم تحفظ کا سامنا نہیں۔
ایل جی نے کہا کہ پولیس فورس نے اچھی حکمرانی، اختراع، سماجی ہم آہنگی اور ایک منصفانہ معاشرے کی تشکیل میں نمایاں خدمات انجام دی ہیں۔
لیفٹیننٹ گورنر نے کہا کہ وردی پہننے والا ہر فرد عوامی توقعات پر پورا اترنے کا عہد کرتا ہے اور اسے دیانتداری، غیر جانبداری اور ہمدردی کے ذریعے عوام کا اعتماد حاصل کرنا چاہیے۔
سنہا نے کہا کہ جموں و کشمیر پولیس امن، سلامتی اور جمہوری اقدار کے تحفظ کے لیے پوری طرح پرعزم ہے تاکہ ہر شہری سکون کے ماحول میں ترقی کر سکے۔
ایل جی نے مزید کہا’’تمام وسائل اور عزم کے ساتھ جموں و کشمیر پولیس دہشت گردی کے خلاف زیرو ٹالرنس پالیسی پر عمل پیرا ہے، اور تمام متعلقہ اداروں کے ساتھ مل کر ایک جامع حکمت عملی پر کام جاری ہے، جس کے تحت جلد ہی خطے کو دہشت گردی سے پاک بنایا جائے گا‘‘۔
تقریب میں ۴۳۰تربیت یافتہ کانسٹیبلز نے اپنی بنیادی تربیت مکمل کی اور حلف اٹھایا۔ اس موقع پر نمایاں کارکردگی دکھانے والوں میں جانی وکٹر (آل راؤنڈ بیسٹ)، وشال بھارت (دوسرے نمبر پر)، یوگیش شرما (تیسرے نمبر پر)، پنکج رینا (انڈور بیسٹ)، توصیف احمد لون (آؤٹ ڈور بیسٹ)، طاہر رشید ڈار (بہترین نشانہ باز)، تسلیم کوثر (پریڈ کمانڈر) اور سشانت شرما (سیکنڈ اِن کمانڈ) شامل تھے۔
تقریب میں ڈی جی پی نلین پربھات سمیت دیگر اعلیٰ حکام بھی موجود تھے۔
