سرینگر؍۱۰مارچ
سرینگر کے بٹہ مالو علاقے میں منگل کی شام ایک ٹریپ کارروائی کے دوران مبینہ طور پر رشوت طلب کرنے اور وصول کرنے کے الزام میں ایک پٹواری کو گرفتار کر لیا گیا، ذرائع نے بتایا۔
حکام کے مطابق یہ کارروائی اس وقت عمل میں لائی گئی جب ایک شکایت موصول ہوئی جس میں الزام لگایا گیا تھا کہ مذکورہ پٹواری نے ریونیو ریکارڈ سے متعلق ایک سرکاری کام انجام دینے کے عوض شکایت کنندہ سے رشوت طلب کی تھی۔
شکایت موصول ہونے کے بعد انسدادِ بدعنوانی بیورونے جال بچھایا جس کے دوران ملزم پٹواری صفدر (پٹواری بٹہ مالو) کو بٹہ مالو میں رشوت کی رقم وصول کرتے ہوئے رنگے ہاتھوں گرفتار کر لیا گیا۔
حکام نے بتایا کہ ملزم کو فوری طور پر حراست میں لے لیا گیا اور اس کے قبضے سے دس ہزار روپے کی رشوت کی رقم برآمد کی گئی۔
اس سلسلے میں مقدمہ درج کر لیا گیا ہے اور معاملے کی مزید تحقیقات جاری ہے۔
