چیف سیکریٹری کاجموں کشمیر میں اے آئی کے مستقبل کی حکمت عملی طے کرنے کے لیے اہم فریقین سے تبادلہ خیال
ڈی آئی پی آر
جموں؍۹مارچ
چیف سیکریٹری اتل ڈولو نے آج جموں و کشمیر میں حکمرانی اور عوامی خدمات کی فراہمی کو مؤثر بنانے کے لیے مصنوعی ذہانت(اے آئی) کے استعمال اور اس کے دائرہ کار کو وسعت دینے کے سلسلے میں مختلف اسٹیک ہولڈرز کے ساتھ تفصیلی تبادلہ خیال کیا۔
اجلاس میں شہریوں سے متعلق مختلف شعبوں میں اے آئی پر مبنی اقدامات کے امکانات پر تفصیلی گفتگو کی گئی اور یونین ٹیریٹری میں ان اقدامات کو تیز کرنے کے لیے مضبوط ادارہ جاتی اور تکنیکی فریم ورک قائم کرنے کے طریقوں پر غور کیا گیا۔
شرکاء نے اس بات پر بھی تبادلہ خیال کیا کہ جدید ٹیکنالوجی کے ذریعے انتظامی کارکردگی، فیصلہ سازی اور عوام کے لیے سرکاری خدمات کی رسائی کو کس طرح بہتر بنایا جا سکتا ہے۔
اجلاس کے دوران چیف سیکریٹری نے کہا کہ مصنوعی ذہانت جموں و کشمیر میں گورننس کو جدید بنانے اور عوامی خدمات کے معیار اور دائرہ کار کو بہتر بنانے کے لیے بے پناہ امکانات رکھتی ہے۔ انہوں نے تمام محکموں پر زور دیا کہ وہ اپنے اپنے شعبوں میں ایسے مواقع کی نشاندہی کریں جہاں اے آئی پر مبنی حل کے ذریعے کارکردگی، شفافیت اور نتائج کو بہتر بنایا جا سکے۔
ڈولو نے کہا کہ یونین ٹیریٹری انتظامیہ، متعلقہ مرکزی وزارتوں، آئی آئی ٹی جموں، BISAG-N اور دیگر تکنیکی اداروں کے درمیان مضبوط تال میل انتہائی ضروری ہے تاکہ اے آئی پر مبنی اقدامات کو بروقت اور مؤثر انداز میں نافذ کیا جا سکے۔
حکمت عملی کی رہنمائی اور نگرانی کے لیے چیف سیکریٹری نے ایک اعلیٰ سطحی اسٹیئرنگ کمیٹی کے قیام کی تجویز پیش کی جس کی صدارت ایڈیشنل چیف سیکریٹری محکمہ پبلک ورکس کریں گے۔ اس کمیٹی میں آئی آئی ٹی جموں، BISAG-N کے نمائندوں کے ساتھ سیکریٹری اطلاعاتی ٹیکنالوجی اور انسپکٹر جنرل آف پولیس جموں بطور اراکین شامل ہوں گے اور یہ کمیٹی اے آئی منصوبوں کے نفاذ کی رہنمائی اور درپیش رکاوٹوں کو دور کرنے میں مدد دے گی۔
چیف سیکریٹری نے محکمہ اطلاعاتی ٹیکنالوجی کو ہدایت دی کہ وہ محکمے کے اندر ایک خصوصی نظام قائم کرے جو مختلف محکموں کے ساتھ اے آئی سے متعلق اقدامات کی ہم آہنگی کو یقینی بنائے۔ انہوں نے اس ادارہ جاتی ڈھانچے کو مؤثر بنانے کے لیے ماہر انسانی وسائل کی نشاندہی اور تعیناتی کی بھی ضرورت پر زور دیا۔
صلاحیت سازی کی اہمیت کو اجاگر کرتے ہوئے انہوں نے جموں و کشمیر میں ابھرتی ہوئی ٹیکنالوجیز کے لیے سینٹر آف ایکسی لینس(سی ای او) کے جلد قیام اور ہنر مندی کے اداروں میں ڈیٹا انوویشن لیبز کے قیام کی ضرورت پر زور دیا۔ انہوں نے کہا کہ ایسی سہولیات خطے کو مستقبل کی تکنیکی چیلنجز کے لیے تیار کرنے اور ڈیٹا سائنس و مصنوعی ذہانت کے شعبوں میں ہنر مند افرادی قوت تیار کرنے میں اہم کردار ادا کریں گی۔
چیف سیکریٹری نے محکمہ اسکولی تعلیم کو بھی ہدایت دی کہ ثانوی سطح کے طلبہ کے لیے مصنوعی ذہانت سے متعلق بنیادی تعارفی کورس متعارف کرانے کے امکانات کا جائزہ لیا جائے۔ انہوں نے یہ بھی تجویز دی کہ مشن یووا کے تحت اے آئی سے متعلق مہارتوں کے پروگرام شامل کیے جائیں تاکہ نوجوان جدید ٹیکنالوجی کی مہارتیں حاصل کر سکیں اور ان کے روزگار کے امکانات میں اضافہ ہو۔
اجلاس کے دوران مختلف محکموں کے انتظامی سیکریٹریوں نے اپنے شعبوں میں اے آئی پر مبنی ٹولز کے استعمال کے حوالے سے تجاویز پیش کیں تاکہ کارکردگی، ڈیٹا تجزیہ، خدمات کی فراہمی اور فیصلہ سازی کے عمل کو بہتر بنایا جا سکے۔
انڈیا اے آئی مشن کے سی ای او ابھیشیک سنگھ نے تجویز دی کہ یونین ٹیریٹری میں ایک مرکزی اے آئی ٹیم تشکیل دی جائے جو مقامی سطح پر اس مشن کے نفاذ کی رہنمائی کرے۔ انہوں نے یقین دہانی کرائی کہ قومی مشن جموں و کشمیر میں اے آئی پروگراموں کے لیے مکمل تعاون فراہم کرے گا۔
ڈولو نے مزید مشورہ دیا کہ ابتدائی مرحلے میں یونین ٹیریٹری پانچ ترجیحی شعبوں کی نشاندہی کرے جہاں پائلٹ بنیادوں پر اے آئی منصوبے شروع کیے جائیں۔ ان منصوبوں کی کامیابی کے بعد دیگر اقدامات کو مرحلہ وار وسعت دی جا سکتی ہے۔ انہوں نے سینٹر آف ایکسی لینس اور ڈیٹا لیبز کے قیام کو بھی انتہائی اہم قرار دیا تاکہ خطے میں اے آئی جدت کو فروغ دینے کے لیے مقامی صلاحیت پیدا کی جا سکے۔
آئی آئی ٹی جموں کے ڈائریکٹر پروفیسر منوج گور نے ان اقدامات کو بروقت اور اہم قرار دیتے ہوئے کہا کہ ادارے کے پاس آفات سے نمٹنے اور خطرات کو کم کرنے کے حوالے سے مضبوط تحقیقی صلاحیت موجود ہے جسے جموں و کشمیر میں اے آئی پر مبنی گورننس کے حل تیار کرنے کے لیے استعمال کیا جا سکتا ہے۔ انہوں نے مقامی زبانوں میں ڈیٹا پائپ لائنز تیار کرنے کے ادارے کے کام کو بھی اجاگر کیا۔
BISAG-N کے اسپیشل ڈائریکٹر جنرل ونئے ٹھاکر نے جموں و کشمیر میں گورننس کے لیے اے آئی پر مبنی حل متعارف کرانے میں ادارے کے مکمل تعاون کا یقین دلایا۔ انہوں نے ان اقدامات کے مؤثر نفاذ اور نگرانی کے لیے ایک خصوصی پروجیکٹ مینجمنٹ یونٹ قائم کرنے کی ضرورت پر بھی زور دیا۔
انسپکٹر جنرل آف پولیس جموں بھیم سین توتی نے اجلاس کو بتایا کہ پولیس محکمہ نے پہلے سے دی گئی ہدایات کے مطابق تفتیش اور قانونی کارروائیوں کو بہتر بنانے کے لیے ایک اے آئی پر مبنی ٹول تیار کیا ہے جو اس وقت آخری مراحل میں ہے اور اس سے عملی کارکردگی میں نمایاں بہتری آئے گی۔ انہوں نے بتایا کہ یہ نظام مکمل طور پر اندرونی طور پر کام کرے گا اور اسے انٹرنیٹ کنکشن کی ضرورت نہیں ہوگی۔
اس سے قبل سیکریٹری اطلاعاتی ٹیکنالوجی ڈاکٹر پیوش سنگلا نے جموں و کشمیر میں گورننس کے لیے اے آئی کے استعمال کے حوالے سے اب تک کی پیش رفت سے اجلاس کو آگاہ کیا۔ انہوں نے بتایا کہ ابھرتی ہوئی ٹیکنالوجیز کے لیے سینٹر آف ایکسی لینس کے قیام کے لیے ۲۰کروڑ روپے مالیت کی تفصیلی پروجیکٹ رپورٹ آئی ٹی محکمہ اور آئی آئی ٹی جموں نے مشترکہ طور پر تیار کر کے وزارت الیکٹرانکس و انفارمیشن ٹیکنالوجی کو منظوری کے لیے پیش کی ہے۔ یہ مرکز مرکز اور یونین ٹیریٹری کے درمیان۹۰:۱۰فنڈنگ پیٹرن کے تحت قائم کیا جائے گا۔
انہوں نے مزید بتایا کہ مرکزی فنڈنگ کے تحت یونین ٹیریٹری کے مختلف انڈسٹریل ٹریننگ انسٹی ٹیوٹس میں آٹھ ڈیٹا انوویشن لیبز قائم کرنے کی تجویز بھی پیش کی گئی ہے جو ڈیٹا سائنس اور اے آئی کے شعبے میں بنیادی سطح پر صلاحیت سازی میں اہم کردار ادا کریں گی۔
انہوں نے اس بات پر بھی زور دیا کہ جموں و کشمیر اے آئی مشن قائم کیا جائے تاکہ مختلف محکموں میں اے آئی سے متعلق اقدامات کو منظم انداز میں ہم آہنگ کیا جا سکے۔
اجلاس کے دوران گورننس کے مختلف شعبوں میں اے آئی کے ممکنہ استعمال کی نشاندہی بھی کی گئی جن میں آفات کے خطرات سے متعلق ابتدائی انتباہی نظام، زراعت اور باغبانی کے لیے مشاورتی پلیٹ فارم، صحت کے شعبے میں مریضوں کی تشخیص اور بیماریوں کی نگرانی کے نظام، دفتری کاموں کی خودکاریت، تعلیم میں اے آئی پر مبنی تدریسی نظام، زمین و بنیادی ڈھانچے کی نگرانی، نوجوانوں کے لیے روزگار اور ہنر کی مطابقت کے پلیٹ فارم اور شکایات کے ازالے کے لیے اے آئی پر مبنی نظام شامل ہیں۔
اس موقع پر چیف سیکریٹری نے محکمہ اطلاعاتی ٹیکنالوجی کے دو ماہانہ رسالے “ڈیجیٹل دھارا” کے پہلے شمارے کا اجرا بھی کیا۔ اس اشاعت کا مقصد ڈیجیٹل بیداری اور شفافیت کو فروغ دینا اور جموں و کشمیر میں آئی ٹی گورننس کی اہم پیش رفت کو اجاگر کرنا ہے۔ یہ رسالہ ابھرتی ہوئی تکنیکی رجحانات اور اختراعات کے بارے میں بھی قارئین کو باقاعدگی سے آگاہ کرے گا
