شوپیاں میں بھی اشتعال انگیز مواد کی تشہیر کے الزام میں مقدمہ درج:پولیس
ایجنسیز
سرینگر؍۴مارچ
پولیس کا کہنا ہے کہ ڈیجیٹل اور سوشل میڈیا پلیٹ فارمز پر جھوٹے، من گھڑت اور گمراہ کن مواد کی تشہیر سے متعلق موصولہ مصدقہ اطلاعات پر کارروائی کرتے ہوئے آغا سید روح اللہ مہدی (رکن پارلیمان) اور جنید عظیم متو (سابق سری نگر مئیر) کے خلاف مقدمات درج کئے گئے ہیں۔
سری نگر پولیس نے ایک بیان میں کہا کہ زیر بحث مواد بظاہر مسخ شدہ بیانیے اور غیر مصدقہ معلومات کی ترسیل پر مشتمل تھا، جو عوامی بے چینی اور سماجی ہم آہنگی میں خلل ڈالنے کا سبب بن سکتا تھا۔انہوں نے کہا کہ اس نوعیت کی دانستہ غلط معلومات کی اشاعت امن، سلامتی اور مجموعی استحکام کے لئے سنگین خطرہ ثابت ہوسکتی ہے۔
ان کا کہنا ہے کہ اس ضمن میں سائیبر پولیس اسٹیشن سری نگر میں بھارتیہ نیائے سنتہا (بی این ایس) کی دفعات۱۹۷(۱)(ڈی) اور۳۵۳(۱)(بی) کے تحت ایف آئی آر نمبر۲/۲۰۲۶اور۳/۲۰۲۶درج کئے گئے اور دونوں مقدمات کی تحقیقات شروع کی گئیں۔
سری نگر پولیس نے عوامی امن اور قانون و نظم کو برقرار رکھنے کے اپنے عزم کا اعادہ کرتے ہوئے شہریوں کو مشورہ دیا ہے کہ وہ آن لائن مواد شیئر کرنے سے قبل مستند اور سرکاری ذرائع سے معلومات کی تصدیق کریں اور کسی بھی غیر مصدقہ مواد کی تشہیر سے گریز کریں جو فرقہ وارانہ ہم آہنگی یا عوامی نظم و نسق میں خلل ڈال سکتا ہو۔
انہوں نے کہا کہ قانون کے مطابق مزید قانونی کارروائی بھی عمل میں لائی جائے گی۔
ادھرپولیس کا کہنا ہے کہ جنوبی کشمیر کے ضلع شوپیاں میں سوشل میڈیا پلیٹ فارموں پر اشتعال انگیز مواد کی تشہیر پر عوامی نظم ونسق کو متاثر کرنے الزام میں ایک شخص کے خلاف مقدمہ درج کیا گیا۔
شوپیاں پولیس نے اپنے ایک بیان میں کہا کہ سوشل میڈیا پلیٹ فارموں پر ایسے اشتعال انگیز مواد کی تشہیر کا نوٹس لیا گیا جو عوامی نظم ونسق کی بر قراری کے لئے نقصان دہ پایا گیا۔
پولیس نے کہا کہ اطلاع کے مطابق ایک شخص جاوید احمد کھانڈے ولد علی محمد کھنڈے ساکن سزن کیگام کو مبینہ طور پر بعض ویڈیوز کو ایسے کیپشنز اور تنصروں کے ساتھ شیئر اور پھیلانے میں ملوث پایا گیا جو بادی النظر میں امن عامہ کو متاثر کرنے اور قانون و نظم کی صورتحال کو خراب کرنے کی صلاحیت رکھتے تھے۔
ان کا کہنا ہے’’اس سلسلے میں پولیس اسٹیشن شوپیاں (پولیس پوسٹ کیگام) میں متعلقہ دفعات کے تحت ایک ایف آئی آر زیر نمبر۲۶/۲۰۲۶ایک مقدمہ درج کیا گیا اور تفتیش کا آغاز کیا گیا‘‘۔انہوں نے کہا کہ قانون کے مطابق مزید کارروائی عمل میں لائی جائے گی۔
شوپیاں پولیس نے امن و امان برقرار رکھنے کے اپنے عزم کا اعادہ کرتے ہوئے عوام سے اپیل کی ہےکہ وہ سوشل میڈیا کا استعمال کرتے وقت ذمہ داری اور احتیاط کا مظاہرہ کریں۔
