کانگریس نے ہریانہ کی باول اسمبلی سیٹ کے لیے 7 کروڑ مانگے: بی جے پی

نئی دہلی، 3 مارچ (یو این آئی) بھارتیہ جنتا پارٹی (بی جے پی) نے انڈین نیشنل کانگریس پر الزام لگایا ہے کہ ہریانہ اسمبلی انتخابات کے دوران باول سیٹ کے لیے سات کروڑ روپے مانگے ہیں۔ بی جے پی کے ترجمان پردیپ بھنڈاری نے منگل کے روز پارٹی ہیڈکوارٹر میں منعقدہ پریس کانفرنس میں اور بی جے پی آئی ٹی سیل کے قومی کنوینر امت مالویہ نے ایکس پر پوسٹ کے ذریعے یہ الزامات عائد کرتے ہوئے 10 جن پتھ اور کانگریس کی اعلیٰ قیادت کو نشانہ بنایا۔ مسٹر بھنڈاری نے کہا کہ گزشتہ کچھ عرصے سے ملک بھر میں گاندھی-واڈرا خاندان کے حوالے سے بدعنوانی اور سودے بازی کی چرچا ہو رہی ہے۔ انہوں نے میڈیا کے سامنے ہریانہ اسمبلی انتخابات کے دوران باول سیٹ سے ٹکٹ کے لیے ہریانہ مہلا کانگریس کی ایک عہدیدار کے شوہر گورو کمار کی واٹس ایپ چیٹ پیش کرتے ہوئے سات کروڑ روپے مانگے جانے کا دعویٰ کیا۔
انہوں نے الزام لگایا کہ ان چیٹس میں کانگریس کے سینئر رہنماؤں راہل گاندھی، پرینکا گاندھی واڈرا، کے سی وینوگوپال اور کے سریش کے قریبی افراد کا ذکر ہے اور ٹکٹ کے بدلے سات کروڑ روپے مانگے گئے۔
مسٹر بھنڈاری نے کہا کہ یہ کوئی معمولی الزام نہیں ہے، انہوں نے دعویٰ کیا کہ گاندھی-واڈرا خاندان نے اپنے ہی کارکن سے سات کروڑ روپے لینے کی کوشش کی۔ مسٹر مالویہ نے کہا کہ کانگریس قیادت کو ان الزامات پر واضح جواب دینا چاہیے تاکہ کارکنوں اور عوام میں پیدا ہونے والے شکوک دور ہو سکیں۔