وزیر اعظم مودی کی سلطانِ عمان اور ولی عہد کویت سے گفتگو

ان  ممالک میں ہونے والے حملوں پر تشویش کا اظہار کیا
ایجنسیز
نئی دہلی؍۳مارچ
وزیر اعظم نریندر مودی نے منگل کو عمان کے سلطان ہيثم بن طارق اور کویت کے ولی عہد شیخ صباح الخالد الحمد المبارک الصباح سے ٹیلی فون پر بات چیت کی اور مغربی ایشیا میں جاری تنازع کے دوران ان کے ممالک پر حملوں پر تشویش کا اظہار کیا،۔
سرکاری ذرائع کے مطابق وزیر اعظم نے دونوں رہنماؤں سے گفتگو کے دوران وہاں مقیم بھارتی برادری کی فلاح و بہبود اور سلامتی کے امور پر بھی تبادلہ خیال کیا۔
ایک عہدیدار نے کہا’’وزیر اعظم نے منگل کی دوپہر خلیجی خطے کے دو اہم رہنماؤں سے بات کی۔ انہوں نے سلطانِ عمان، سلطان ہيثم بن طارق سے فون پر گفتگو کی اور کویت کے ولی عہد شیخ صباح الخالد الحمد المبارک الصباح سے بھی بات چیت کی‘‘۔
دونوں رہنماؤں کے ساتھ گفتگو کے دوران وزیر اعظم نے ان کے ممالک میں ہونے والے حملوں پر تشویش ظاہر کی اور وہاں مقیم بھارتی کمیونٹی کی فلاح و سلامتی کے معاملات پر تبادلہ خیال کیا۔
یہ ٹیلی فونک رابطے ایسے وقت میں ہوئے جب امریکا اور اسرائیل کی جانب سے ایران کے خلاف ایک مربوط کارروائی کی گئی، جس میں اسلامی ملک کے سپریم لیڈر آیت اللہ علی خامنہ ای ہلاک ہوگئے۔ اس کے جواب میں ایران نے اسرائیل، خلیجی خطے میں موجود امریکی فوجی تنصیبات، اور عالمی تجارتی و ہوا بازی مراکز دبئی اور دوحہ پر ڈرون اور میزائل حملے کیے ہیں۔
گزشتہ دو روز کے دوران وزیر اعظم مودی بحرین کے بادشاہ اور سعودی عرب کے ولی عہد سے بھی بات کر چکے ہیں اور ان ممالک کی خودمختاری اور علاقائی سالمیت کی خلاف ورزی کرتے ہوئے کیے گئے حالیہ حملوں کی مذمت کی ہے، یہ کہتے ہوئے کہ بھارت اس مشکل گھڑی میں ان کے عوام کے ساتھ یکجہتی میں کھڑا ہے۔
وزیر اعظم نے اردن کے شاہ عبداللہ دوم سے بھی گفتگو کی اور خطے میں تیزی سے بدلتی صورتحال پر گہری تشویش کا اظہار کیا۔
مودی نے متحدہ عرب امارات کے صدر شیخ محمد بن زاید النہیان اور اسرائیل کے وزیر اعظم بنجمن نیتن یاہو سے بھی بات چیت کی۔ (ایجنسیاں)