پولیس انسپکٹر کیخلاف ناجائز اثاثہ جات کا مقدمہ درج 

جموں: جموں و کشمیر اینٹی کرپشن بیورو (اے سی بی) نے ایک پولیس انسپکٹر کے خلاف اُن کے معلوم ذرائع آمدن سے زائد کروڑوں روپے مالیت کے اثاثے جمع کرنے کے الزام میں ناجائز اثاثہ جات کا مقدمہ درج کر لیا ہے۔
سرکاری ذرائع کے مطابق اے سی بی کی جانب سے کی گئی تصدیقی کارروائی میں انکشاف ہوا کہ انسپکٹر وجے سنگھ چودھری‘جو کہ نائب وزیر اعلیٰ ‘سریندر سنگھ چودھری کے بھائی ہیں‘ساکن نونیال، نوشہرہ (ضلع راجوری) اور اس وقت یونین ٹیریٹری لداخ میں تعینات، نے مبینہ طور پر دس سے زائد جائیدادیں حاصل کیں، جن میں مکانات، دکانیں اور تقریباً۱۰۰کنال اراضی شامل ہیں۔ یہ جائیدادیں زیادہ تر ان کے اہلِ خانہ اور قریبی رشتہ داروں کے نام پر درج ہیں۔
حکام کے مطابق ابتدائی تحقیقات کی بنیاد پر انسدادِ بدعنوانی ایکٹ۱۹۸۸کی دفعہ۱۳(۱)(بی)کے ساتھ دفعہ۱۳(۲)کے تحت ایف آئی آر نمبر۰۲/۲۰۲۶ پولیس اسٹیشن اے سی بی سینٹرل میں درج کی گئی اور باقاعدہ تفتیش شروع کر دی گئی ہے۔
تحقیقات کے دوران خصوصی جج انسدادِ بدعنوانی جموں سے تلاشی وارنٹ حاصل کیے گئے، جس کے بعد اے سی بی کی ٹیموں نے مختلف مقامات پر چھاپے مارے۔ ان میں جموں کے کلوچک علاقے کے سنتوکھ وہار میں واقع رہائش گاہ، نوشہرہ کے نونیال میں گھر، اور باجلتا کے تُتے دی کھوئی علاقے میں قائم اسٹون کریشر اور ٹائل فیکٹری سمیت دیگر کاروباری مقامات شامل ہیں۔
حکام نے بتایا کہ بی این ایس ایس کی دفعہ۱۸۵ کے تحت جموں کے چند دیگر مقامات کی بھی تلاشی لی گئی۔ کارروائی کے دوران کچھ مبینہ طور پر اہم دستاویزات برآمد کر کے ضبط کی گئی ہیں، جبکہ مزید تحقیقات جاری ہیں۔
دریں اثنا، جموں و کشمیر کے نائب وزیر اعلیٰ سریندر کمار چودھری نے اے سی بی کی کارروائی کے بعد اپنے بھائی کا دفاع کرتے ہوئے اسے انتقامی کارروائی قرار دیا۔
میڈیا سے گفتگو کرتے ہوئے انہوں نے کہا’’یہ لڑائی شروع ہو چکی ہے اور ہم اسے قانونی طور پر لڑیں گے۔ ہمیں ہندوستان کی عدلیہ پر اور جموں و کشمیر کے بہت سے دیانتدار افسران پر بھروسہ ہے جو انصاف کو یقینی بنائیں گے۔ اگر وجے سنگھ غلط ہیں تو انہیں سزا ملنی چاہیے‘‘۔
چودھری نے اپنے بھائی کے سروس ریکارڈ کا حوالہ دیتے ہوئے کہا کہ انہوں نے گرسائی، تھنہ منڈی، ڈوڈہ اور سپوال میں عسکریت پسندی کے خلاف کارروائیوں میں حصہ لیا اور جہاں بھی تعینات رہے، بہادری اور پیشہ ورانہ صلاحیت کے باعث شہرت حاصل کی۔
نیشنل کانفرنس کے رہنما نے اس چھاپے کو اپنے خاندان کو’ڈرانے اور بدنام کرنے‘ کی کوشش قرار دیا اور دعویٰ کیا کہ پولیس محکمہ کے اندرونی اختلافات ان کے بھائی کی ترقی میں رکاوٹ بنے ہوئے تھے۔
چودھری نے کہا’’جو لوگ سمجھتے ہیں کہ اس گھر سے کوئی خزانہ نکلے گا، انہیں کچھ نہیں ملے گا۔ پہلے بھی آپ نے دیکھا کہ کارروائیاں ہوئیں، کیا برآمد ہوا؟ کئی فائلیں میرے پاس آتی ہیں جن میں لوگ رنگے ہاتھوں پکڑے جاتے ہیں اور بعد میں بری ہو جاتے ہیں۔ یہ ایک بحث ہے‘‘۔
نائب وزیر اعلیٰ نے مزید کہا’’ہم خوفزدہ نہیں ہیں۔ ہمیں معلوم ہے کہ ہم کون ہیں اور کس موقف پر کھڑے ہیں۔ آخرکار سچ ہی غالب آئے گا۔‘‘