شوپیاں میں منشیات فروش کی ۲۷ لاکھ روپے مالیت کی جائیداد ضبط

سرینگر: جموں و کشمیر پولیس نے منشیات کی غیر قانونی تجارت کے خلاف اپنی کارروائیوں کو جاری رکھتے ہوئے شوپیاں ضلع میں ایک رہائشی جائیداد کو ضبط کر لیا ہے۔ پولیس کے مطابق یہ جائیداد غیر قانونی منشیات کی خرید و فروخت سے حاصل کی گئی کمائی سے تعمیر کی گئی تھی۔
پولیس ترجمان کے مطابق میمندر، شوپیاں کے رہنے والے سرتاج احمد گنائی کی ملکیت یک منزلہ رہائشی مکان، جس کی مالیت۲۶لاکھ۵۶ہزار۸وپے اور پلنتھ ایریا۱۳۹۲مربع فٹ ہے، کو باقاعدہ قانونی کارروائی کے تحت ضبط کیا گیا۔ پولیس کا کہنا ہے کہ مذکورہ ملزم پہلے ہی این ڈی پی ایس ایکٹ کے تحت کئی مقدمات میں ملوث ہے، جن میں ایف آئی آر نمبر۲۰/۲۰۲۱اور۴۹ /۲۰۲۱امل ہیں۔
جائیداد کو ضبط کرنے کی کارروائی ایک مجاز پولیس ٹیم، ایگزیکٹو مجسٹریٹ، لمبردار اور چوکیدار کی موجودگی میں مکمل کی گئی، تاکہ قانونی شفافیت اور ضابطوں پر مکمل عمل درآمد کو یقینی بنایا جا سکے۔
پولیس نے اس عزم کا اعادہ کیا ہے کہ منشیات سے متعلق جرائم کے خلاف سخت کارروائیاں مستقبل میں بھی جاری رہیں گی۔ ساتھ ہی عوام سے اپیل کی گئی ہے کہ وہ منشیات کے کاروبار سے جڑی کسی بھی مشکوک سرگرمی کی فوری اطلاع پولیس کو دیں تاکہ معاشرے کو اس ناسور سے محفوظ رکھا جا سکے۔
ادھرسوپور پولیس نے ایک منشیات فروش کو گرفتار کرکے اس کی تحویل سے ممنوعہ مواد بر آمد کیا۔
ایک پولیس ترجمان نے اپنے ایک بیان میں کہا کہ سوپور پولیس اسٹیشن نے بوٹینگو ہیر پورہ میں ایک کارروائی کے دوران ایک منشیات فروش کو گرفتار کیا۔
انہوں نے کہا کہ تلاشی کے دوران اس کی تحویل سے چرس جیسا مواد اور کوڈین فاسفیٹ کی بوتلیں بر آمد کی گئیں جس کے بعد اس کو موقع پر ہی گرفتار کیا گیا۔
ملزم کی شناخت نثار احمد ملہ ولد محمد شعبان ملہ ساکن مقام شہید میر کے طور پر کی گئی ہے۔
پولیس ترجمان نے بتایا کہ اس ضمن میں پولیس اسٹیشن سوپور میں این ڈی پی ایس ایکٹ کے متعلقہ دفعات کے تحت زیر ایف آئی آر نمبر۳۲/۲۰۲۶ ایک مقدمہ درج کیا گیا اور مزید تحقیقات شروع کی گئیں۔
انہوں نے کہا کہ منشیات کے کاروبار میں ملوث عناصر کے خلاف مسلسل اور سخت کارروائیاں جاری رکھی جائیں گی۔