ڈوڈہ میں مطلوب جیش کمانڈر کے پوسٹر جاری‘ جنگلاتی علاقوں میں تلاشی آپریشن تیز

سرینگر: جموں خطے میں شدت پسند سرگرمیوں کے خلاف جاری کارروائیوں کے بیچ ڈوڈہ پولیس نے کالعدم تنظیم جیشِ محمد کے پاکستانی کمانڈر کی تلاش کے لیے مختلف اہم مقامات پر پوسٹر چسپاں کر دیے ہیں جبکہ پہاڑی اور جنگلاتی علاقوں میں تلاشی مہم مزید تیز کر دی گئی ہے۔
سینئر سپرنٹنڈنٹ آف پولیس ڈوڈہ سندیپ کمار مہتا کے مطابق مطلوب دہشت گرد سیف اللہ کے کشتواڑ کے چھاترو علاقے میں چھپے ہونے کا شبہ ہے اور خفیہ اطلاعات ہیں کہ وہ فرار ہونے کی کوشش کر رہا ہے۔ انہوں نے کہا کہ عوام کی رہنمائی کے لیے اس کے داڑھی کے ساتھ اور بغیر داڑھی دونوں طرح کے پوسٹر جاری کیے گئے ہیں۔
پولیس کے مطابق اطلاعات ہیں کہ وہ شناخت سے بچنے کے لیے بھیس بدل سکتا ہے حتیٰ کہ برقع یا خواتین کے لباس کا سہارا بھی لے سکتا ہے۔ عوام سے اپیل کی گئی ہے کہ کسی بھی مشکوک شخص کی فوری اطلاع پولیس یا سیکورٹی فورسز کو دیں۔
ایس ایس پی نے بتایا کہ گزشتہ چار روز سے ڈوڈہ کے ٹھٹھری علاقے میں مسلسل سرچ آپریشن جاری ہے اور کسی بھی مشتبہ نقل و حرکت کی اطلاع ملتے ہی کارروائی شروع کر دی جاتی ہے۔ انہوں نے شہریوں سے یہ بھی کہا کہ کسی کو مکان یا دکان کرائے پر دینے سے پہلے پولیس کو ضرور مطلع کریں تاکہ تصدیق ممکن ہو سکے۔
حکام کے مطابق یہ پوسٹر مہم حالیہ انکاؤنٹروں اور دہشت گردوں کی موجودگی سے متعلق اطلاعات کے بعد جموں خطے کے بلند پہاڑی علاقوں میں بڑھائی گئی سیکورٹی کارروائیوں کا حصہ ہے۔ ناگری، ڈیسہ، ڈوڈہ داخلی مقام گنپت پل اور ٹھٹھری سمیت متعدد عوامی مقامات پر پوسٹر لگائے گئے ہیں جبکہ مزید علاقوں میں بھی نوٹس چسپاں کیے جا رہے ہیں۔
دریں اثنا سیکورٹی فورسز نے ہفتہ کی صبح گندوہ کے چلی جنگل میں ایک ٹھکانہ تباہ کر کے کھانے پینے کا سامان اور کمبل برآمد کیے جس سے حالیہ نقل و حرکت کا اشارہ ملا ہے اور آس پاس کے جنگلات میں کومبنگ آپریشن مزید تیز کر دیا گیا ہے۔
گزشتہ ایک ماہ کے دوران ڈوڈہ، کشتواڑ، کٹھوعہ، ادھمپور، راجوری اور پونچھ کے بالائی علاقوں میں بڑے پیمانے پر آپریشن جاری ہیں جن میں تقریباً ایک درجن جھڑپیں ہو چکی ہیں۔ ان کارروائیوں میں جیشِ محمد کے چار پاکستانی دہشت گرد اور ایک فوجی اہلکار ہلاک ہوئے۔
حکام کا کہنا ہے کہ مقامی لوگوں کی جانب سے مشکوک نقل و حرکت کی اطلاع کے بعد خاص طور پر ٹھٹھری اور گندوہ کے جنگلات میں سرچ آپریشن مزید سخت کر دیا گیا ہے تاکہ کسی بھی ممکنہ دہشت گرد سرگرمی کو بروقت ناکام بنایا جا سکے۔ (ایجنسیاں)