آر ایس پورہ سیکٹر میں۴۰کروڑ روپے مالیت کا ہیروئن بر آمد:پولیس

جموں: جموں پولیس نے بی ایس ایف کی۱۶۵بٹالین کے ساتھ ایک مشترکہ کارروائی کے دوران آر ایس پورہ سیکٹر میں بین الاقوامی سرحد کے نزدیک تقریباً۴۰کروڑ روپیے مالیت کا ساڑھے ۶کلو سے زیادہ ہیروئن بر آمد کیا۔
ایک پولیس ترجمان نے تفصیلات فراہم کرتے ہوئے کہا کہ بی ایس ایف کی۱۶۵بٹالین کی جانب سے بین الاقوامی سرحد کے نزدیک مشتبہ ڈرون سرگرمی کی اطلاع ملنے پر فوری کارروائی عمل میں لائی گئی۔
انہوں نے کہا کہ۱۳؍اور۱۴فروری کی درمیانی شب آر ایس پورہ سیکٹر کے نئی بستی کروٹانہ باس پور میں جموں پولیس اور بی ایس ایف کی۱۶۵بٹالین نے مشترکہ طور پر محاصرہ اور تلاشی آپریشن شروع کر دیا۔ان کا کہنا ہے کہ ہفتے کی صبح سویرے تلاشی کے دوران گندم کے کھیتوں سے زرد رنگ کے دو پیکٹ بر آمد ہوئے۔
پولیس ترجمان نے بتایا کہ یہ علاقہ بین الاقوامی سرحد کے قریب واقع ہے اور ابتدائی طور پر شبہ ظاہر کیا جا رہا ہے کہ یہ منشیات پاکستان کی جانب سے ڈرون کے ذریعے ہندوستانی حدود میں گرائی گئی ہے۔
انہوں نے کہا کہ ہر پیکٹ میں ہئروئن جیسا مواد موجود تھا اور مجسٹریٹ کی موجودگی میں بر آمدگی کا میمو تیار کیا گیا۔ ان کا کہنا ہے کہ دونوں پیکٹوں میں مجموعی طور پر تقریباً6.582 کلو ہیروئن جیسا مواد بر آمد ہوا ہے جس کی بین الاقوامی مارکیٹ میں مالیت تقریباً۴۰کروڑ روپیے بتائی جا رہی ہے۔
بیان میں کہا گیا کہ اس ضمن میں پولیس اسٹیشن آر ایس پورہ میں این ڈی پی ایس ایکٹ کے تحت زیر ایف آئی آر نمبر۳۶/۲۰۲۶ایک مقدمہ درج کیا گیا اور مزید تحقیقات شروع کی گئیں۔
انہوں نے کہا کہ مزید تحقیقات کے ذریعے بر آمد شدہ منشیات کے اصل ماخذ اور منزل کا سراغ لگایا جا رہا ہے ار پولیس کیس کے پس منظر اور آئندہ روابط کا باریک بینی سے جائزہ لے رہی ہے اور اس میں مزید اہم انکشافات متوقع ہیں۔