جموں: سری نگر کے شہر خاص میں بے ہنگم شہری توسیع اور مناسب رہائشی انفراسٹرکچر کی کمی کے باعث ڈاؤن ٹاؤن سمیت کئی گنجان آباد علاقوں میں شدید بھیڑ بھاڑ اور تنگ رہائش سے متعلق سوال پر حکومت نے کہا ہے کہ اس حوالے سے باقاعدہ ڈیٹا موجود نہیں، تاہم ماسٹر پلان۲۰۲۵شہر کی رہائشی و ترقیاتی ضروریات کو مدنظر رکھتے ہوئے پائیدار شہری نمو کے لیے رہنمائی فراہم کرتا ہے۔
اسمبلی میں رکن اسمبلی سلمان ساگر کے سوالات کا جواب دیتے ہوئے حکومت نے بتایا کہ ’گریٹر سری نگر‘ طرز کی مربوط شہری حکمت عملی کے لیے ماسٹر پلان میں جامع فریم ورک موجود ہے، جس کا مقصد شہر کے ضرورت سے زیادہ بوجھ تلے دبے علاقوں میں بھیڑ کو کم کرنا اور نئے ترقیاتی زون قائم کرنا ہے۔
حکومت نے یہ بھی بتایا کہ سری نگر ڈیولپمنٹ اتھارٹی نے قومی شاہراہ بائی پاس بٹہ مالوبمنہ کے قریب راکھ گند اکھسا میں۱۵۰ ہیکٹر اراضی پر ایک جدید سیٹلائٹ ٹاؤن شپ قائم کرنے کی تجویز تیار کی ہے۔ اس مجوزہ ٹاؤن شپ میں رہائشی پلاٹس، فلیٹس، کمرشل مراکز، بزنس ہب، دفاتر اور تفریحی سہولیات شامل ہوں گی تاکہ شہر کے دباؤ کو کم کیا جا سکے۔
سری نگر اور اس کے مضافاتی علاقوں میں رہائش کی شدید قلت اور ایک ہی چھت کے نیچے کئی خاندانوں کے رہنے سے متعلق سوال پر حکومت نے تصدیق کی کہ متعدد نئی کالونیاں بنانے کی تجاویز پر عمل جاری ہے۔
حکومت کے مطابق ان رہائشی منصوبوں کا مقصد سری نگر کے اندر بڑھتی آبادی، تنگ گلیوں، محدود جگہ اور مشترکہ خاندانی رہائش سے پیدا ہونے والی سماجی و صحت سے متعلق مشکلات کو کم کرنا ہے، تاکہ شہریوں کو باعزت، صحت مند اور بہتر معیارِ زندگی فراہم کیا جاسکے۔
