بڑھتی ڈیجیٹل لت اور ذہنی صحت کے بحران پر تشویش ظاہر

سرینگر: بچوں کے لیے سوشل میڈیا پر پابندی سے متعلق عالمی اقدامات کی جانب اشارہ کرتے ہوئے، حکومت کے اقتصادی سروے نے جمعرات کو کہا ہے کہ آن لائن پلیٹ فارمز تک رسائی کے لیے عمر کی بنیاد پر حدود پر غور کیا جانا چاہیے، جبکہ ڈیجیٹل لت سے بچاؤ کے لیے آن لائن تدریس میں بھی کمی کی ضرورت ہے۔
پارلیمنٹ میں پیش کیے گئے اقتصادی سروے میں کہا گیا ہے کہ اسکول بچوں کی ڈیجیٹل عادات کی تشکیل میں نہایت اہم کردار ادا کر سکتے ہیں۔ سروے نے سفارش کی ہے کہ بچوں کو تعلیمی مواد تک رسائی کے لیے سادہ ڈیوائسز فراہم کی جائیں، تاکہ انہیں آن لائن نقصان دہ مواد سے محفوظ رکھا جا سکے۔
سروے میں کہا گیا’’عمر کی بنیاد پر رسائی کی پالیسیوں پر غور کیا جانا چاہیے، کیونکہ کم عمر صارفین جبری استعمال اور نقصان دہ مواد کے لیے زیادہ حساس ہوتے ہیں۔ سوشل میڈیا، جوئے سے متعلق ایپس، آٹو پلے فیچرز اور ہدفی اشتہارات کے حوالے سے عمر کی تصدیق اور عمر کے مطابق ڈیفالٹ سیٹنگز نافذ کرنے کی ذمہ داری پلیٹ فارمز پر عائد کی جانی چاہیے‘‘۔
اقتصادی سروے میں اس بات پر زور دیا گیا کہ آن لائن پلیٹ فارمز کو عمر کی تصدیق نافذ کرنے کا پابند بنایا جائے اور بچوں کے لیے ایسی سادہ ڈیوائسز کو فروغ دیا جائے جو صرف تعلیمی مقاصد کے لیے ہوں، تاکہ بڑھتی ہوئی ڈیجیٹل لت کے مسئلے سے نمٹا جا سکے۔
سروے کے مطابق’’اسکول ڈیجیٹل عادات کی تشکیل میں کلیدی کردار ادا کرتے ہیں اور انہیں اسکرین ٹائم آگاہی، سائبر سیفٹی اور ذہنی صحت سے متعلق شعور پر مبنی ڈیجیٹل ویلنس نصاب متعارف کرانا چاہیے۔ کووڈ۱۹کے دوران آن لائن تدریسی ذرائع پر بڑھنے والا انحصار کم کیا جانا چاہیے اور بالمشافہ تعلیمی سرگرمیوں کو فروغ دیا جانا چاہیے‘‘۔
اقتصادی سروے۲۰۲۵۔۲۶میں ڈیجیٹل لت کو ایک بڑھتا ہوا مسئلہ قرار دیا گیا ہے، جو نوجوانوں اور بالغ افراد دونوں کی ذہنی صحت کو متاثر کر رہا ہے۔سروے میں خاندانوں کو بھی آگاہ کرنے پر زور دیا گیا ہے اور انہیں اسکرین ٹائم کی حد مقرر کرنے، ڈیوائس فری اوقات اپنانے اور مشترکہ آف لائن سرگرمیوں کو فروغ دینے کی ترغیب دی گئی ہے۔ اس کے ساتھ ساتھ اسکولوں اور کمیونٹی مراکز کے ذریعے والدین کے لیے ورکشاپس منعقد کرنے کی سفارش کی گئی ہے، تاکہ وہ لت کی علامات پہچان سکیں، صحت مند حدود قائم کر سکیں اور پیرنٹل کنٹرول ٹولز کا مؤثر استعمال سیکھ سکیں۔
اس سروے میں کہا گیا’’بچوں کے لیے بنیادی موبائل فونز یا صرف تعلیمی مقاصد کے لیے مخصوص ٹیبلٹس جیسے سادہ آلات کو فروغ دینا، استعمال کی حدود اور مواد کے فلٹرز کے ساتھ، پرتشدد، جنسی یا جوئے سے متعلق نقصان دہ مواد سے نمائش کو کم کر سکتا ہے‘‘۔
اس کے علاوہ سروے نے نیٹ ورک سطح کے حفاظتی اقدامات کی بھی سفارش کی ہے، جیسے انٹرنیٹ سروس پرووائیڈر کی سطح پر ایسے فیملی ڈیٹا پلانز متعارف کرانا جن میں تعلیمی اور تفریحی ایپس کے لیے الگ الگ کوٹے ہوں، اور خطرناک مواد کی ڈیفالٹ بلاکنگ ہو، جسے والدین کی اجازت سے کھولا جا سکے۔
اقتصادی سروے میں آسٹریلیا، چین اور جنوبی کوریا سمیت مختلف ممالک کی جانب سے اٹھائے گئے اقدامات کا حوالہ دیا گیا اور حکومت کے موجودہ اقدامات کے ساتھ مزید مداخلتوں کی ضرورت پر زور دیا گیا۔
ڈیجیٹل لت کے بڑھتے ہوئے رجحان کا نوٹس لیتے ہوئے سروے میں کہا گیا ہے کہ یہ مسئلہ تعلیمی کارکردگی، کام کی جگہ پر پیداواریت اور نوجوانوں و بالغوں دونوں کی ذہنی صحت پر منفی اثر ڈال رہا ہے۔ تحقیق کا حوالہ دیتے ہوئے کہا گیا کہ ڈیجیٹل لت کے نوجوانوں میں خاص طور پر سنگین ذہنی اثرات سامنے آتے ہیں۔
سروے کے مطابق’’سوشل میڈیا کی لت کا گہرا تعلق بے چینی، ڈپریشن، کم خود اعتمادی اور سائبر بُلیئنگ کے دباؤ سے ہے، اور متعدد بھارتی و عالمی مطالعات سے ثابت ہوتا ہے کہ۱۵سے۲۴سال کی عمر کے افراد میں اس کا پھیلاؤ زیادہ ہے‘‘۔
اس میں کہا گیا کہ مسلسل اسکرولنگ اور دوسروں سے موازنہ کرنے کا رجحان خاص طور پر بے چینی اور ڈپریشن سے جڑا ہوا ہے۔ عالمی ادارۂ صحت نے گیمنگ ڈس آرڈر کو بیماریوں کی بین الاقوامی درجہ بندی  میں شامل کر لیا ہے۔
ڈبلیو ایچ او کے مطابق، گیمنگ ڈس آرڈر ایسا رویہ ہے جس میں گیمنگ پر کنٹرول ختم ہو جاتا ہے، دیگر سرگرمیوں پر اسے ترجیح دی جاتی ہے، اور منفی نتائج کے باوجود گیمنگ جاری رکھی جاتی ہے۔
اقتصادی سروے میں کہا گیا ہے کہ گیمنگ ڈس آرڈر نیند میں خلل، جارحیت، سماجی تنہائی اور ڈپریشن کا سبب بن سکتا ہے، جبکہ نوعمر اس سے خاص طور پر متاثر ہوتے ہیں۔ آن لائن جوا اور حقیقی رقم پر مبنی گیمنگ سے مالی دباؤ، ذہنی دباؤ، بے چینی اور خودکشی کے خیالات جیسے نقصانات کے شواہد بھی موجود ہیں۔
سروے کے مطابق’’اسٹریمنگ اور مختصر ویڈیوز کی لت بھی نیند کے خراب معمولات، توجہ میں کمی اور بڑھتے ہوئے دباؤ سے جڑی ہوئی ہے۔ یہ تمام عوامل ڈیجیٹل لت کی کثیر جہتی نوعیت اور ذہنی صحت پر اس کے سنگین اثرات کو واضح کرتے ہیں۔‘‘