جموں میں۵۰لاکھ روپے مالیت کا مسروقہ سونا بر آمد، ملزم خواتین مفرور

جموں: جموں پولیس نے شہر کے قلب میں واقع ایک شو روم میں ہونے والے ایک ہائی پروفائل چوری کے معاملے میں بڑی کامیابی حاصل کرتے ہوئے تقریباً۵۰لاکھ روپیے مالیت کے مسروقہ سونے کے زیورات بر آمد کر لئے ہیں۔
ایک پولیس ترجمان نے اپنے ایک بیان میں کہا کہ پولیس اسٹیشن پکا ڈنگا میں۲۰ستمبر۲۰۲۵کو شانو منہاس نے شکایت درج کرائی کہ گیم چینجز شو روم پکا ڈنگا میں خریداری کے دوران ان کا پرس، جس میں سونے کے زیورات موجود تھے، چوری ہوگیا۔
ترجمان نے کہا کہ اس شکایت کی بنیاد پر بی این ایس کی متعلقہ دفعات کے تحت ایک ایف آئی آر زیر درج کی گئی اور تحقیقات شروع کی گئی۔
ان کا کہنا ہے کہ تحقیقات کے دوران پولیس اسٹیشن پکا ڈنگا کی ایک ٹیم نے شوروم اور اطراف کے علاقوں کی سی سی ٹی وی فوٹیج کا باریک بینی سے تجزیہ کیا۔
پولیس ترجمان نے بتایا کہ فوٹیج میں دو غیر مقامی خواتین کے ملوث ہونے کا انکشاف ہوا جس کے بعد ملزمان کی تصاویر سوشل میڈیا، نیوز چینلز اور مختلف ریاستوں کے بس اڈوں اور بھیڑ بھاڑ والے عوامی مقامات پر وسیع پیمانے پر جاری کی گئیں۔
ترجمان نے کہا کہ سی ڈی آرز، لوکیشن ڈیٹا اور دیگر ڈیجیٹل شواہد کی تکنیکی جانچ پر مبنی مسلسل تفتیش کے نتیجے میں پولیس مدھیہ پردیش کے ضلع راج گڑھ تک پہنچی جہاں متعدد چھاپے مارے گئے۔ان کا کہنا ہے کہ کارروائیوں کے دوران تقریباً۵۰لاکھ روپیے مالیت کے تمام مسروقہ سونے کے زیوارت کامیابی سے بر آمد کئے گئے تاہم ملزم خواتین کارروائی کے دوران فرار ہونے میں کامیاب ہوگئیں۔
بیان میں کہا گیا کہ ایک پولیس ٹیم ملزموں کی گرفتاری کے لئے موقع پر تعینات ہے جبکہ دوسری ٹیم بر آمدہ شدہ مال کے ساتھ جموں واپس آچکی ہے۔انہوں نے کہا کہ اس ضمن میں مزید تفتیش اور تلاشی کارروائیاں جاری ہیں۔