بھاری برفباری:وادی میں زمینی و فضائی رابطہ منقطع

سرینگر: خراب موسمی حالات کے پیش نظر جمعہ کے روز کشمیر آنے اور جانے والی فضائی آمد و رفت معطل رہی، جب سرینگر ہوائی اڈے پر تمام پروازیں منسوخ کر دی گئیں، حکام نے بتایا۔
ہوائی اڈے کے حکام نے کہا’’مسلسل برفباری، آپریشنل علاقوں میں برف کے جمع ہونے اور راستے میں خراب موسم کی پیش گوئی کے پیش نظر، مسافروں کی سلامتی کو مدنظر رکھتے ہوئے سرینگر ہوائی اڈے پر آج کے لیے تمام پروازیں منسوخ کر دی گئی ہیں۔‘‘
حکام نے بتایا کہ مسافروں کو مشورہ دیا گیا ہے کہ وہ تازہ صورتحال اور متبادل انتظامات کے لیے اپنی متعلقہ ایئر لائنز سے رابطہ کریں۔
گزشتہ شب کشمیر کے بیشتر حصوں میں تازہ برفباری ریکارڈ کی گئی، جس میں سرینگر شہر میں بھی رواں موسم کی پہلی برفباری شامل ہے۔ محکمہ موسمیات نے پیش گوئی کی ہے کہ موجودہ موسمی نظام جمعہ کی شام تک جاری رہنے کا امکان ہے۔
بھاری برفباری کے باعث جمعہ کے روز بانہال،بارہمولہ ریل سیکشن پر ریل سروس متاثر رہی، جب حکام نے احتیاطی طور پر اہم مسافر ٹرینیں منسوخ کر دیں، حکام نے بتایا۔
جمعہ کی علی الصبح جاری ایک سرکاری اطلاع کے مطابق، بڈگام سے بانہال چلنے والی ٹرین نمبر 74613 اور بانہال سے بڈگام جانے والی ٹرین نمبر 74614 کو خراب موسمی حالات اور ریلوے ٹریک پر بھاری برف جمع ہونے کے باعث منسوخ کر دیا گیا۔ یہ فیصلہ مسافروں کی حفاظت کو مدنظر رکھتے ہوئے کیا گیا کیونکہ خطے میں برفباری کا سلسلہ جاری ہے۔
ریلوے حکام نے کہا کہ پٹریوں پر برف جمع ہونے اور حدِ نگاہ میں کمی کے باعث ٹرین آپریشن غیر محفوظ ہو گیا تھا، جس کے پیش نظر دن بھر کے لیے سروس معطل کرنے کا فیصلہ لیا گیا۔ اس منسوخی سے روزانہ سفر کرنے والے بڑی تعداد میں مسافر متاثر ہوئے، جو جنوبی، وسطی اور شمالی کشمیر کے درمیان آمد و رفت کے لیے بانہال بارہمولہ ریل رابطے پر انحصار کرتے ہیں۔
بھارتی ریلوے کے حکام نے کہا کہ جب تک موسمی حالات بہتر نہیں ہوتے اور ریلوے ٹریک کو برف سے صاف کر کے محفوظ قرار نہیں دیا جاتا، تب تک ٹرین سروس معطل رہے گی۔ مسافروں کو مشورہ دیا گیا ہے کہ سفر کی منصوبہ بندی سے قبل ریلوے کے سرکاری ذرائع سے تازہ معلومات حاصل کریں۔
حکام نے عوام سے اپیل کی ہے کہ جاری شدید موسم کے دوران احتیاط برتیں، کیونکہ اگر برفباری کا سلسلہ جاری رہا تو ٹرانسپورٹ سروسز میں مزید رکاوٹوں کا امکان رد نہیں کیا جا سکتا۔
اس دوران حکام کے نتایا کہ وادی کو ملک کے باقی حصوں کے ساتھ جوڑنے والی سری نگر، جموں قومی شاہراہ، مغل روڈ اور وادی کو لداخ کے ساتھ جوڑنے والی سری نگر، لیہہ شاہراہ پر بھاری برف باری کے باعث ٹریفک کی نقل و حمل مکمل طور پر بند ہے ۔
انہوں نے لوگوں سے کہا ہے کہ وہ برف ہٹانے تک ان شاہراہوں پر سفر کرنے سے گریز کریں اور کسی بھی افوا پر کان نہ دھریں۔
حکام نے لوگوں سے کہا ہے کہ وہ ان شاہراہوں کی تازہ صورتحال معلوم کرنے کے لئے ٹریفک پولیس کی متعلقہ چنیلز کی طرف رجوع کریں۔