مودی آج کیرالہ میں ترقیاتی منصوبوں کا سنگِ بنیاد اور افتتاح کریں گے

نئی دہلی، 22 جنوری (یو این آئی)
وزیراعظم نریندر مودی جمعہ کے روز کیرالہ کے دورے پر جائیں گے جہاں وہ ترواننت پورم میں مختلف ترقیاتی منصوبوں کا سنگِ بنیاد رکھیں گے اور افتتاح کریں گے ۔ اس موقع پر وہ ایک عوامی اجتماع سے بھی خطاب کریں گے ۔
وزیراعظم کے دفتر کے مطابق یہ منصوبے ریل رابطہ، شہری روزگار، سائنس اور اختراع، شہری مرکز خدمات اور جدید صحت سہولیات جیسے اہم شعبوں سے متعلق ہیں۔ یہ منصوبے شہریوں کی ہمہ گیر ترقی، تکنیکی پیش رفت اور معیارِ زندگی میں بہتری کو ترجیح دینے کے وزیراعظم کے مسلسل عزم کی عکاسی کرتے ہیں۔
اس دوران وزیراعظم چار نئی ٹرین کو ہری جھنڈی دکھائیں گے جن میں تین امرت بھارت ایکسپریس اور ایک مسافر گاڑی شامل ہے ۔ ان میں ناگرکوئل۔ منگلورو امرت بھارت ایکسپریس، ترواننت پورم۔ تامبرم امرت بھارت ایکسپریس، ترواننت پورم۔چرلاپلی امرت بھارت ایکسپریس اور تریشور۔گرووایور کے درمیان نئی مسافر ٹرین شامل ہیں۔ ان خدمات کے آغاز سے کیرالہ، تمل ناڈو، کرناٹک، تلنگانہ اور آندھرا پردیش کے درمیان طویل فاصلے اور علاقائی رابطے میں نمایاں بہتری آئے گی جبکہ مسافروں کے لیے سفر زیادہ آسان، محفوظ اور وقت کا پابند بنے گا۔ بہتر رابطے سے سیاحت، تجارت، تعلیم، روزگار اور ثقافتی تبادلے کو بھی فروغ ملے گا۔
شہری روزگار کو مضبوط بنانے کی کوششوں کے تحت وزیراعظم پی ایم سوَنِدھی کریڈٹ کارڈ کا آغاز کریں گے جو اسٹریٹ وینڈرز کے لیے مالی شمولیت کے اگلے مرحلے کی علامت ہے ۔ یو پی آئی سے منسلک یہ بلاسود روالونگ کریڈٹ نظام فوری نقدی فراہم کرے گا، ڈیجیٹل لین دین کو فروغ دے گا اور مستفیدین کو باضابطہ قرض تک رسائی میں مدد دے گا۔ وزیراعظم پی ایم سوَنِدھی اسکیم کے تحت ایک لاکھ مستفیدین میں قرض بھی تقسیم کریں گے ، جن میں کیرالہ کے اسٹریٹ وینڈرز بھی شامل ہیں۔ سال 2020 میں آغاز کے بعد سے اس اسکیم نے بڑی تعداد میں لوگوں کو پہلی بار باضابطہ قرض کی سہولت فراہم کی ہے اور شہری غیر رسمی مزدوروں کے درمیان غربت کے خاتمے اور روزگار کے تحفظ میں اہم کردار ادا کیا ہے ۔
سائنس اور اختراع کے شعبے میں وزیراعظم ترواننت پورم میں سی ایس آئی آر۔این آئی آئی ایس ٹی انوویشن، ٹیکنالوجی اور انٹرپرینیورشپ سینٹر کی بنیاد رکھیں گے ۔ یہ مرکز لائف سائنسز اور بایو اکانومی پر توجہ مرکوز کرے گا، آیوروید جیسے روایتی علمی نظاموں کو جدید بایوٹیکنالوجی سے جوڑے گا، پائیدار پیکیجنگ اور گرین ہائیڈروجن کو فروغ دے گا اور اسٹارٹ اپس کی تخلیق، ٹیکنالوجی منتقلی اور عالمی تعاون کی حوصلہ افزائی کرے گا۔ یہ تحقیق کو مارکیٹ کے لیے تیار حل اور کاروباری اداروں میں تبدیل کرنے کا ایک اہم پلیٹ فارم ثابت ہوگا۔
صحت کے ڈھانچے کو مضبوط بنانا بھی اس دورے کی ترجیح ہوگی۔ وزیراعظم ترواننت پورم میں واقع شری چِترا تیرونال انسٹی ٹیوٹ فار میڈیکل سائنسز اینڈ ٹیکنالوجی میں جدید ترین ریڈیوسرجری مرکز کی بنیاد رکھیں گے ۔ یہ سہولت پیچیدہ دماغی امراض کے لیے نہایت درست علاج فراہم کرے گی جس سے خطے میں تیسرے درجے کی صحت خدمات کی صلاحیت میں نمایاں اضافہ ہوگا۔
اس کے علاوہ، وزیراعظم ترواننت پورم میں نئے پوجاپُّرا مرکزی ڈاک گھر کا افتتاح بھی کریں گے ۔ یہ جدید، ٹیکنالوجی سے لیس سہولت ڈاک، انشورنس اور ڈیجیٹل خدمات کی وسیع رینج فراہم کرے گی جس سے شہری مرکز خدمات کی فراہمی مزید مضبوط ہوگی۔