بارہمولہ اور پلوامہ میں تین منشیات فروش گرفتار‘ چرس جیسا مواد بر آمد:پولیس

سرینگر: منشیات اسمگلنگ کے خلاف مہم کو وسیع پیمانے پر جاری رکھتے ہوئے بارہمولہ پولیس نے الگ الگ کارروائیوں کے دوران دو منیشات فروشوں کو گرفتار کیا ہے اور بھاری مقدار میں چرس جیسا ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں کہا کہ بارہمولہ پولیس کی ایک ٹیم نے فقیر باغ علاقے میں ناکے کے دوران دو افراد کو دھر لیا۔
ترجمان نے کہا کہ ابتدائی تفتیش کے دوران گرفتار شدہ افراد نے اپنی شناخت نصیر احمد ملہ ولد غلام محمد ملہ ساکن دود بگ چندوسہ اور محمد اشرف ملہ ولد غلام قادر ملہ ساکن دود بگ چندوسہ کے طور پر ظاہر کی۔
بیان میں کہا گیا کہ تلاشی کے دوران نصیر احمد ملہ کے قبضے سے۴۶۷ گرام چرس پاؤڈر جیسا مواد اور ایک موبائل فون بر آمد کیا گیا جبکہ محمد اشرف ملہ کی تحویل سے۳۳گرام چرس جیسا مواد،۷ ہزار۲ سو۴۰روپیے نقدی اور ایک موبائل فون بر آمد کیا گیا۔
انہوں نے کہا کہ اس ضمن میں پولیس اسٹیشن چندوسہ میں این ڈی پی ایس ایکٹ کے متعلقہ دفعات کے تحت زیر ایف آئی آر درج کی اور مزید تحقیقات شروع کی گئی۔
پولیس ترجمان نے بتایا کہ اسی طرح کی ایک اور کارروائی کے دوران پولیس پوسٹ واگورہ کو یہ مصدقہ اطلاع موصول ہوئی کہ فاروق احمد چوپان عرف بیٹا ولد غلام حسن چوپان ساکن وترگام نے اپنے رہائشی مکان میں غیر قانونی طور پر چرس جیسا مواد ذخیرہ کر رکھا ہے ۔
ترجمان نے کہا کہ اس سلسلے میں پولیس اسٹیشن کریری میں این ڈی پی ایس ایکٹ کے دفعہ۸/۲۰ے تحت زیر ایف آئی آر زیر نمبر۲/۲۰۲۶؍ایک مقدمہ درج کیا گیا۔
ان کا کہنا ہے کہ مکان کی تلاشی کے دوران ایگزیکٹو مجسٹریٹ واگورہ، آزاد گواہوں جن میں نمبر دار، سابق سرپنچ اور پولیس پوسٹ واگورہ کے اہلکار شامل تھے ، کی موجودگی میں 7.212 کلو چرس جیسا ممنوعہ مواد بر آمد کرکے ضبط کیا گیا۔
پولیس ترجمان نے بتایا کہ ملزم تاحال مفرور ہے اور اس کی تلاش جاری ہے ۔انہوں نے کہا کہ بارہمولہ پولیس معاشرے سے منشیات کے خاتمے کو یقینی بنانے کے لئے پر عزم ہے ۔
اس دوران منشیات فروشوں کے خلاف مہم کو تواتر کے ساتھ جاری رکھتے ہوئے پلوامہ پولیس نے ایک منشیات فروش کو گرفتار کرکے اس کے قبضے سے چرس جیسا ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں کہا کہ پلوامہ پولیس ایک ٹیم نے کل پورہ علاقے میں معمول کی گشت کے دوران ایک شخص کو روکا۔
انہوں نے کہا کہ تلاشی کے دوران اس کے قبضے سے 4.5 کلو چرس پاؤڈر جیسا ممنوعہ مواد بر آمد کیا گیا۔
ملزم کی شناخت پرویز احمد ڈار ولد علی محمد ڈار ساکن کل پورہ کے طور پر ہوئی ہے ۔ان کا کہنا ہے کہ ملزم کو بر سر موقع ہی گرفتار کیا گیا جبکہ بر آمد شدہ مواد کو قانونی ضوابط کے تحت ضبط کیا گیا۔
پولیس ترجمان نے کہا کہ اس ضمن میں پولیس اسٹیشن لٹر میں این ڈی پی ایس ایکٹ کے متعلقہ دفعات کے تحت زیر ایف آئی آر درج کیا گیا اور مزید تحقیقات شروع کی گئی۔انہوں نے کہا کہ پلوامہ پولیس منشیات کے خلاف مہم کو جاری رکھنے کے لئے پر عزم ہے ۔