برفباری کے باوجود وادی میں موسم سرما غیر معمولی طور پر گرم ‘ درجہ حرارت معمول سے تین سے سات ڈگری سینٹی گریڈ زیادہ درج
سرینگر:محکمۂ موسمیات کے مطابق کشمیر کے بالائی علاقوں میں تازہ برفباری ہوئی ہے، جبکہ آئندہ۲۴ گھنٹوں کے دوران وادی کے بیشتر مقامات پر ہلکی سے درمیانی بارش یا برفباری کا امکان ظاہر کیا گیا ہے۔
حکام کے مطابق بادلوں کی موجودگی کے باعث رات کے درجۂ حرارت موسمی اوسط سے زیادہ رہے اور بیشتر علاقوں میں نقطۂ انجماد سے اوپر درج کیے گئے۔
تازہ برفباری کے باوجود وادی کشمیر اس وقت غیر معمولی طور پر گرم موسمِ سرما کا سامنا کر رہی ہے، جہاں درجۂ حرارت معمول سے تین سے سات ڈگری سینٹی گریڈ زیادہ درج کیا جا رہا ہے۔
محکمۂ موسمیات کے حکام نے کہا کہ شمالی کشمیر کے بعض حصوں میں، جن میں بانڈی پورہ کا گریز، بارہمولہ کا گلمرگ اور کپواڑہ کا مژھل شامل ہیں، تازہ برفباری ہوئی ہے، جبکہ دیگر بالائی علاقوں سے بھی ہلکی سے درمیانی برفباری کی اطلاعات موصول ہوئی ہیں۔
محکمۂ موسمیات کے مطابق بدھ کی رات سے جمعرات کی صبح تک بیشتر علاقوں میں ہلکی سے درمیانی بارش یا برفباری کا امکان ہے۔
بیان میں مزید کہا گیا کہ شمالی اور وسطی کشمیر کے چند بالائی اور انتہائی بالائی علاقوں میں درمیانی سے شدید برفباری بھی ہو سکتی ہے۔محکمۂ موسمیات نے یہ بھی کہا کہ جمعہ کے روز بعض الگ تھلگ مقامات پر ہلکی بارش یا برفباری کا ایک مختصر دورانیہ متوقع ہے۔
محکمہ موسمیات کے ایک ترجمان نے بتایا کہ وادی میں۳۱دسمبر اور یکم جنوری کو موسم ابر آلود رہنے کے ساتھ کئی مقامات پر ہلکی سے درمیانی درجے کی برف باری کا امکان ہے جس کا زیادہ اثر۳۱دسمبر کی شام سے یکم جنوری کی صبح یا دوپہر تک رہ سکتا ہے ۔
محکمہ نے کہا کہ اس دوران شمالی اور وسطی کشمیر کے کچھ پہاڑی علاقوں میں درمیانی سے بھاری برف باری کا امکان ہے ۔ ان کا کہنا ہے کہ وادی میں۲جنوری کو بھی موسم جزوی سے مجموعی طور پر ابر آلود رہنے کے ساتھ کہیں کہیں ہلکی بارف باری ہوسکتی ہے ۔
محکمہ نے بتایا کہ بعد میں۳سے۵جنوری تک موسم جزوی طور پر ابر آلود مگر مجموعی طور پر خشک رہنے کا امکان ہے ۔ انہوں نے کہا کہ۶جنوری کو موسم ایک بار پر عام طور پر خشک رہنے کے ساتھ شمالی اور وسطی کشمیر کے پہاڑی علاقوں میں کہیں کہیں ہلکی برف باری کی توقع ہے ۔
ان کا کہنا ہے کہ بعد ازاں وادی میں۷سے۱۳جنوری تک موسم کبھی جزوی تو کبھی مجموعی طور پر ابر آلود رہنے کا امکان ہے ۔
محکمے نے اپنی ایڈوائزری میں مسافروں اور ٹرانسپورٹروں سے کہا ہے کہ وہ ٹریفک اور انتظامیہ کی طرف سے جاری مشوروں پر سختی سے عمل کریں۔ انہوں نے کہ جموں صوبے کے کچھ علاقوں میں اگلے۴۸گھنٹوں کے دوران درمیانی درجے سے گھنی دھند چھائی رہ سکتی ہے ۔
ادھر مطلع ابر آلود رہنے سے وادی میں شبانہ درجہ حرارت میں نمایاں بہتری ریکارڈ ہونے سے ٹھٹھرتی سردیوں سے لوگوں کو کسی حد تک راحت نصیب ہوئی ہے ۔
حکام کے مطابق منگل کی رات سری نگر میں کم سے کم درجۂ حرارت۳۔۲ ڈگری سینٹی گریڈ ریکارڈ کیا گیا، جو اس وقت کے معمول سے۹۔۴ ڈگری گریڈ زیادہ ہے۔گلمرگ خطے کا سرد ترین مقام رہا، جہاں درجۂ حرارت منفی۳ڈگری سیلسیس تک گر گیا، تاہم یہ بھی معمول سے تقریباً تین ڈگری زیادہ تھا۔
جنوبی کشمیر میں پہلگام میں کم سے کم درجۂ حرارت منفی۸۔۱ڈگری سیلسیس ریکارڈ کیا گیا، جو معمول سے سات ڈگری زیادہ ہے، جبکہ وادی کے گیٹ وے قصبے قاضی گنڈ میں پارہ۴۔۱ڈگری سیلسیس پر آ کر ٹھہرا۔
اس وقت خطہ ’’چلۂ کلان‘‘ کے مرحلے سے گزر رہا ہے، جو شدید سردی کا۴۰روزہ دورانیہ ہوتا ہے۔ اس عرصے کے دوران عموماً رات کا درجۂ حرارت تین سے آٹھ ڈگری سیلسیس تک نقطۂ انجماد سے نیچے چلا جاتا ہے، تاہم موجودہ درجۂ حرارت معمول کے موسمی پیٹرن سے واضح انحراف ظاہر کر رہا ہے۔
