ریزرویشن پالیسی میں توازن اور میرٹ کا احترام ناگزیر:روح اللہ

سرینگر/۲۷دسمبر
وسطی کشمیر کے ضلع بڈگام کے خان صاحب علاقے میں ہفتہ کو عوامی دربار سے خطاب کرتے ہوئے رکنِ پارلیمان آغا روح اللہ مہدی نے فلاحی طرزِ حکمرانی، جوابدہی اور عوامی مسائل کے حل کے لیے سنجیدہ اقدامات کی ضرورت پر زور دیا۔
مہدی نے کہا کہ منتخب حکومتیں عوام کی خدمت کے لیے ہوتی ہیں اور نمائندوں کی اخلاقی ذمہ داری ہے کہ وہ لوگوں کے ساتھ کھڑے ہوں اور ان کے مفاد میں کام کریں۔
روح اللہ نے اپنے خطاب میں کہا کہ جب نمائندے عوام سے ووٹ مانگتے ہیں تو اس کے بدلے ان پر لازم ہے کہ وہ لوگوں کے مفاد، ان کی سہولیات اور ان کی بہتری کے لیے عملی اقدامات کریں۔ ان کا کہنا تھا کہ جب ایم ایل ایز، ایم پیز یا سرکاری افسران اپنی ذمہ داریاں پوری کرنے میں ناکام رہتے ہیں تو اس کا سب سے زیادہ خمیازہ عام شہریوں کو بھگتنا پڑتا ہے ۔
این سی رکن لوک سبھا نے موجودہ سیاسی نظام کی کارکردگی پر عدم اطمینان کا اظہار کرتے ہوئے کہا کہ عوام کے بنیادی مسائل کے لیے سنجیدہ آوازیں اٹھانے کا فقدان ہے ۔ ان کے مطابق زمین اور نوکریوں کے تحفظ سے متعلق معاملات میں بہت کم پیش رفت ہوئی ہے ، جس کی وجہ سے یہ سوال جنم لیتا ہے کہ اگر عوامی نمائندے بنیادی سہولیات‘جیسے سڑکیں، پینے کا پانی اور دیگر ضروری خدمات‘فراہم کرنے میں ناکام ہیں تو پھر ان کا کردار کیا ہے ۔
مہدی نے مزید کہا کہ عوام نے عرصہ دراز تک مشکلات اور دباؤ برداشت کیا ہے ، اور اب ضرورت اس بات کی ہے کہ سب مل کر ان کی مدد کریں۔
گورننس اور بیوروکریسی کا حوالہ دیتے ہوئے انہوں نے کہا کہ’’حکمران اور وائسرائے آتے جاتے رہتے ہیں، لیکن سرکاری افسران کو یاد رکھنا چاہیے کہ انہیں اسی سماج اور انہی لوگوں کے درمیان رہنا ہے ‘‘۔انہوں نے کہا کہ افسران کو یہ بات سمجھنی چاہیے کہ وہ اسی زمین کا حصہ ہیں اور ان کا فرض ہے کہ وہ اس خطے کے لوگوں کے مفاد میں کام کریں۔
تحفظات (ریزرویشن) سے متعلق بات کرتے ہوئے ایم پی نے اوپن میرٹ کے امیدواروں کے مسائل پر تشویش ظاہر کی۔ ان کا کہنا تھا کہ اوپن میرٹ پر دستیاب اسامیوں کی تعداد بہت کم ہے ، جس سے میرٹ پر آنے والے امیدوار متاثر ہو رہے ہیں۔ انہوں نے واضح کیا کہ وہ ریزرویشن کے مخالف نہیں، تاہم انہوں نے منصفانہ اور متوازن پالیسی کی ضرورت پر زور دیا جو تمام طبقات کے حقوق کا تحفظ کرے اور میرٹ کو بھی نظرانداز نہ ہونے دے ۔ایجنسیز