وندے بھارت کشمیر کی نئی لائف لائن بن گئی ہے :ڈاکٹر فاروق

سرینگر/۲۲ دسمبر
نیشنل کانفرنس کے صدر اور جموں و کشمیر کے سابق وزیر اعلیٰ فاروق عبداللہ نے پیر کے روز کہا کہ وندے بھارت ٹرین کشمیر کے عوام کے لیے ایک لائف لائن بن کر ابھری ہے، خاص طور پر سردیوں کے مہینوں میں جب سڑکوں کا رابطہ منقطع ہو جاتا ہے اور موسم کی خرابی کے باعث پروازیں اکثر تاخیر کا شکار رہتی ہیں۔
فاروق عبداللہ نے پیر کے روز ماتا ویشنو دیوی کے بیس کیمپ کٹرا سے وندے بھارت ٹرین کے ذریعے سرینگر کا سفر کیا۔حکام کے مطابق ڈاکٹر فاروق کٹرا قصبہ پہنچے، جہاں سے انہوں نے وندے بھارت ٹرین میں سوار ہو کر سرینگر کا رخ کیا۔
بعد ازاںصحافیوں سے بات کرتے ہوئے فاروق عبداللہ نے نئی شروع کی گئی وندے بھارت سروس کا حوالہ دیتے ہوئے کہا کہ اس ٹرین نے مسافروں کو بڑی راحت فراہم کی ہے۔انہوں نے کہا ’’وندے بھارت ٹرین کشمیر کے لیے ایک لائف لائن بن گئی ہے۔ اگر برف باری کی وجہ سے سڑکیں بند ہو جائیں یا پروازیں تاخیر کا شکار ہوں تب بھی یہ ٹرین چلتی رہے گی‘‘۔
فاروق عبداللہ نے کہا کہ کشمیر میں سردیاں اکثر روزمرہ زندگی کو شدید طور پر متاثر کرتی ہیں، جہاں قومی شاہراہیں کئی کئی دن بند رہتی ہیں اور فضائی سفر غیر یقینی ہو جاتا ہے۔ ایسے حالات میں، ان کے مطابق، یہ ٹرین مسافروں، طلبہ، مریضوں اور تاجروں کے لیے ایک قابلِ اعتماد متبادل فراہم کرتی ہے۔
این سی سربراہ نے کہا کہ بہتر ریل رابطہ نہ صرف خراب موسم کے دوران عوام کو محفوظ سفر میں مدد دے گا بلکہ معاشی سرگرمیوں کو بھی تقویت پہنچائے گا اور ضروری اشیاء کی ہموار ترسیل کو یقینی بنائے گا۔
داکٹر فاروق نے کہا کہ قابلِ اعتماد سفری رابطے وادی کے لیے نہایت اہم ہیں، خاص طور پر سردیوں کے مہینوں میں جب تنہائی ایک بڑا مسئلہ بن جاتی ہے۔
ان کاکہنا تھا’’ برف باری اگرچہ مشکلات پیدا کرتی ہے، تاہم یہ وادی کے لیے ایک نعمت بھی ہے۔ انہوں نے کہا ’’برف باری ہمارے لیے اللہ کی نعمت ہے اور ہم دعا کرتے ہیں کہ اللہ ہمیں مزید برف عطا کرے‘‘۔
تازہ برف باری پر ردِعمل ظاہر کرتے ہوئے انہوں نے کہا کہ برف ہمیشہ سے اس خطے کے لیے ذریعہ روزگار اور امید رہی ہے۔ انہوں نے دوبارہ کہا، ’’برف باری ہمارے لیے ایک نعمت ہے۔ اللہ ہمیں اس سے مزید نوازے۔‘‘