’آپریشنل وجوہات‘: سرینگر ایئرپورٹ سے دو پروازیں منسوخ

سرینگر/۲۲دسمبر
آپریشنل وجوہات کی بنا پر سرینگر انٹرنیشنل ایئرپورٹ سے پیر کی صبح دو پروازیں متعلقہ ایئرلائنز کی جانب سے منسوخ کر دی گئی ہیں۔
ایئرپورٹ حکام کے مطابق یہ فیصلہ انتظامی و تکنیکی بنیادوں پر لیا گیا ہے‘ جس کا مقصد مسافروں کی سلامتی اور پروازوں کی بہتر ترتیب کو یقینی بنانا ہے ۔
حکام نے بتایا کہ منسوخ کی گئی پروازوں سے سفر کرنے والے مسافروں کو ہدایت دی گئی ہے کہ وہ تازہ ترین صورتحال، متبادل انتظامات اور آئندہ شیڈول کیلئے براہِ راست اپنی متعلقہ ایئرلائن سے رابطہ کریں۔
ایئرپورٹ انتظامیہ نے واضح کیا کہ مسافروں کو ایئرپورٹ پہنچنے سے قبل فلائٹ اسٹیٹس کی تصدیق ضرور کرنی چاہیے تاکہ کسی بھی قسم کی پریشانی سے بچا جا سکے ۔
ایئرپورٹ حکام نے کہا کہ پروازوں کی منسوخی سے مسافروں کو ہونے والی زحمت پر افسوس ہے اور ان کے تعاون و صبر کو سراہا جاتا ہے ۔ انہوں نے مزید کہا کہ صورتحال پر مسلسل نظر رکھی جا رہی ہے اور جیسے ہی حالات معمول پر آئیں گے ، پروازوں کی بحالی سے متعلق بروقت اطلاع دی جائے گی۔
قابلِ ذکر ہے کہ حالیہ دنوں میں موسمی اور آپریشنل وجوہات کی بنا پر سرینگر ایئرپورٹ پر پروازوں کے شیڈول میں تبدیلیاں دیکھنے میں آ رہی ہیں، جس کے پیش نظر مسافروں کو احتیاط برتنے اور سفری منصوبہ بندی میں لچک رکھنے کا مشورہ دیا گیا ہے ۔