وادی میںہرایک دہشت گرد کا خاتمہ ضروری‘

لیفٹیننٹ گورنر منوج سنہا نے جمعرات کو کہا کہ۲۰۱۹ کے بعد جموں و کشمیر میں حاصل ہونے والی ’’سلامتی کی کامیابیوں‘‘ کا ہر حال میں دفاع کیا جانا چاہیے اور وادی، جنگلات، پہاڑی علاقوں یا دیہات میں سرگرم ہر ایک دہشت گرد کو ختم کرنا لازمی ہے۔
آئی آئی ٹی جموں میں منعقدہ یونین ٹیریٹری سطح کی پہلی سکیورٹی کانفرنس سے خطاب کرتے ہوئے لیفٹیننٹ گورنر نے دہشت گردوں، ان کے سہولت کاروں اور نظریاتی حامیوں کے خلاف مربوط کارروائی کی ضرورت پر زور دیا تاکہ دہشت گردی کے پورے ماحولیاتی نظام اور محفوظ پناہ گاہوں کا خاتمہ کیا جا سکے۔
سنہا نے کہا’’۲۰۱۹کے بعد حاصل ہونے والی حقیقی سلامتی کی کامیابیوں کا تحفظ ضروری ہے اور وادی، جنگلات، پہاڑوں یا دیہات میں سرگرم ہر ایک دہشت گرد اور اس کے حامیوں کو ختم کیا جانا چاہیے‘‘۔
یہ سکیورٹی کانفرنس قومی سطح پر منعقد ہونے والی ڈی جی پیز اور آئی جی پیز کانفرنس کی طرز پر منعقد کی گئی ہے اور جموں و کشمیر میں اپنی نوعیت کی پہلی کانفرنس ہے۔
لیفٹیننٹ گورنر نے کہا کہ گزشتہ چھ برسوں میں سکیورٹی گرڈ کو مضبوط کیا گیا ہے۔ جموں و کشمیر پولیس، فوج، انٹیلی جنس ایجنسیوں اور مرکزی مسلح پولیس فورسز (سی اے پی ایف ) کی مشترکہ کوششوں کے نتیجے میں دہشت گردانہ تشدد، سرگرم دہشت گردوں کی تعداد اور نئی بھرتیوں میں نمایاں کمی آئی ہے۔
سنہا نے کہا’’مسلح دہشت گردوں، ان کے حامیوں، اوور گراؤنڈ ورکرز (او جی ڈبلیوز) اور عام شہریوں کو دھمکانے والے عناصر کے ساتھ یکساں سلوک کیا جانا چاہیے۔ ہمیں یقینی بنانا ہوگا کہ وہ اپنے اقدامات کی بھاری قیمت چکائیں‘‘۔
لیفٹیننٹ گورنر نے بدلتے ہوئے خطرات سے نمٹنے، انٹیلی جنس صلاحیتوں کو مزید مضبوط بنانے اور نئے دور کے سکیورٹی چیلنجز سے نمٹنے کیلئے اگلی سطح کے سکیورٹی گرڈ کی تشکیل پر بھی تفصیلی گفتگو کی۔
سنہا نے کہا’’حالیہ برسوں میں سلامتی کے خطرات کا منظرنامہ یکسر تبدیل ہو چکا ہے۔ ہمیں ردعمل پر مبنی حکمتِ عملی سے نکل کر پیشگی اور فعال سکیورٹی حکمتِ عملی اپنانا ہوگی اور دہشت گردی، دہشت گردوں کی مالی معاونت، انتہاپسندی اور نارکو ٹیررازم جیسے خطرات سے نمٹنے کیلئے مصنوعی ذہانت (اے آئی) جیسے جدید ذرائع کا استعمال کرنا ہوگا‘‘۔
اپنے خطاب میں منوج سنہا نے کہا کہ وزیر اعظم نریندر مودی اور مرکزی وزیر داخلہ امت شاہ کی قیادت میں یہ سکیورٹی کانفرنس دہشت گردی کی ہر شکل سے نمٹنے کے لیے ’’ہول آف گورنمنٹ اپروچ‘‘ تیار کرنے کا ایک اہم پلیٹ فارم ثابت ہوگی۔
ایل جی نے کہا کہ رواں سال رائے پور میں منعقدہ ڈی جی پیز اور آئی جی پیز کانفرنس میں ’’وکست بھارت: سلامتی کے پہلو‘‘ کے عنوان پر تفصیلی غور و خوض کیا گیا، جو تیزی سے بدلتی دنیا کے تقاضوں کے مطابق پولیس نظام کو جدید بنانے کے تئیں مرکزی حکومت کے عزم کی عکاسی کرتا ہے۔
لیفٹیننٹ گورنر نے ایک بار پھر اس بات کو دہرایا کہ گزشتہ چھ برسوں میں سکیورٹی گرڈ کو مضبوط بنایا گیا ہے اور جموں و کشمیر پولیس، فوج، انٹیلی جنس ایجنسیوں اور سی اے پی ایف کی مشترکہ کوششوں سے دہشت گردانہ سرگرمیوں، سرگرم دہشت گردوں اور بھرتیوں میں نمایاں کمی آئی ہے۔
سنہا نے کہا’’مسلح دہشت گرد، ان کے حامی، اوور گراؤنڈ ورکرز اور عام شہریوں کو خوف زدہ کرنے والے عناصر سب کے ساتھ یکساں سلوک ہونا چاہیے، اور ہمیں یہ یقینی بنانا ہوگا کہ وہ اپنے اعمال کی سخت سزا بھگتیں‘‘۔
دن بھر جاری رہنے والی اس سکیورٹی کانفرنس میں جموں و کشمیر پولیس کے سینئر افسران، انٹیلی جنس اداروں کے حکام، سول انتظامیہ اور مرکزی مسلح پولیس فورسز کے نمائندوں نے شرکت کی۔