پاکستان اور بنگلہ دیش سیریز کا شیڈول تبدیل: پی ایس ایل کے باعث میچز دو حصوں میں تقسیم

ڈھاکہ: 18 دسمبر (یواین آئی ) بنگلہ دیش کرکٹ بورڈ (بی سی بی) نے پاکستان کے خلاف آئندہ ہوم سیریز کے شیڈول میں اہم تبدیلیوں کا اشارہ دے دیا ہے۔ بی سی بی حکام کے مطابق، پاکستان سپر لیگ ( پی ایس ایل) کی مصروفیات کے باعث اب یہ سیریز دو حصوں میں کھیلی جائے گی، جس کا کچھ حصہ پی ایس ایل سے پہلے اور بقیہ حصہ ٹورنامنٹ کے بعد منعقد ہوگا۔
بنگلہ دیش کرکٹ آپریشنز کے چیئرمین نجم العابدین نے میڈیا سے گفتگو کرتے ہوئے تصدیق کی کہ پاکستان کے خلاف سیریز اب دو مراحل میں ہوگی۔ کرک بز کی رپورٹ کے مطابق پہلا مرحلہ: پی ایس ایل سے قبل تین ون ڈے میچز کھیلے جائیں گے۔دوسرا مرحلہ مئی میں پی ایس ایل کے اختتام پر دو ٹیسٹ میچوں کی سیریز مکمل کی جائے گی۔
واضح رہے کہ ابتدائی طور پر اس دورے میں تین ٹی ٹوئنٹی میچز بھی شامل تھے، تاہم دونوں بورڈز کی باہمی رضامندی سے انہیں ختم کر دیا گیا ہے کیونکہ بنگلہ دیش رواں سال جون میں پہلے ہی پاکستان کے خلاف ٹی ٹوئنٹی سیریز کھیل چکا ہے۔
بی سی بی نے اسٹار فاسٹ بولر مستفیض الرحمان کی دستیابی کے حوالے سے بھی صورتحال واضح کر دی ہے۔ کولکتہ نائٹ رائڈرز (کے کے آر) کی نمائندگی کرنے والے مستفیض الرحمان پورے آئی پی ایل سیزن کے لیے دستیاب نہیں ہوں گے۔
نجم العابدین نے بتایا”ہم نے مستفیض الرحمان کو آئی پی ایل کے لیے این او سی دے دیا ہے، لیکن وہ نیوزی لینڈ کے خلاف ون ڈے سیریز کے لیے آٹھ دن کے لیے وطن واپس آئیں گے۔ نیوزی لینڈ کے خلاف تین میچوں کی ون ڈے سیریز مکمل کرنے کے بعد وہ دوبارہ اپنی آئی پی ایل فرنچائز کو جوائن کر سکیں گے۔”بنگلہ دیش کرکٹ بورڈ کے اس فیصلے کا مقصد اپنے کھلاڑیوں کو لیگ کرکٹ کے مواقع فراہم کرنے کے ساتھ ساتھ قومی ٹیم کی بین الاقوامی مصروفیات کو بھی یقینی بنانا ہے