پن بجلی پروجیکٹ ڈیولپر معاہدوں کی خلاف ورزی کر رہے ہیں، مقامی افراد کو روزگار نہیں دے رہے:کچلو

جموںکشمیر نیشنل کانفرنس کے رکنِ پارلیمنٹ سجاد احمد کچلو نے منگل کے روز راجیہ سبھا میں الزام لگایا کہ جموں و کشمیر میں ہائیڈرو پاور پروجیکٹ بنانے والی کمپنیاں طے شدہ شرائط کی خلاف ورزی کر رہی ہیں اور مقامی لوگوں کو روزگار نہیں دے رہیں۔ انہوں نے اس معاملے کی انکوائری کا مطالبہ بھی کیا۔
راجیہ سبھا میں زیرو آور کے دوران کچلو نے کہا کہ یونین ٹیریٹری جموں و کشمیر کے لیے بجلی کا بنیادی ذریعہ ہائیڈرو پاور ہے، اور این ایچ پی سی کچھ منصوبے تیار کر رہا ہے جبکہ دیگر منصوبے جموں و کشمیر پاور ڈویلپمنٹ کارپوریشن لمیٹڈ (جے کے پی ڈی سی) بنا رہی ہے۔
کچلو نے الزام لگایا کہ ہائیڈرو پاور پروجیکٹ ڈیولپر مقامی روزگار کی ذمہ داریوں کو پورا کرنے میں ناکام ہیں۔ انہوں نے مزید الزام لگایا کہ (ڈیولپر اور ریاست کے درمیان طے شدہ) معاہدے کی خلاف ورزی کی جا رہی ہے۔
این سی رکن نے بے دخل کیے گئے لوگوں کی ناقص بازآبادکاری کا مسئلہ بھی اٹھایا اور کہا کہ جو لوگ آواز اٹھا رہے ہیں اْن کے خلاف پولیس شکایات درج ہو رہی ہیں۔ انہوں نے اس معاملے کی تحقیقات کے لیے ایک خصوصی کمیٹی کی تشکیل کا مطالبہ کیا۔
کچلو نے بتایا کہ چناب دریا پر تعمیر کیے جا رہے چار ہائیڈرو پروجیکٹس پاکل دْل، رَتلے، کیرو اور کوار ہیں۔
بی جے ڈی کے رکنِ پارلیمنٹ سسمت پاترا نے اڑیسہ کے ضلع گنجام میں رنگیلونڈا ایئر اسٹرپ کو ایک مکمل، سہولیات سے آراستہ برہم پور ایئرپورٹ میں تبدیل کرنے کا مطالبہ کیا۔ انہوں نے کہا کہ یہ اب محض علاقائی خواہش نہیں بلکہ ایک قومی معاشی ضرورت ہے۔
بی جے پی کے رکنِ پارلیمنٹ سنجے سیٹھ نے حکومت سے درخواست کی کہ ارکانِ پارلیمنٹ لوکل ایریا ڈویلپمنٹ اسکیم کے قواعد میں تبدیلی کی جائے تاکہ جان لیوا بیماریوں کے علاج کے لیے ۱۰ فیصد فنڈ فراہم کیا جا سکے۔
بی جے پی کے رکنِ پارلیمنٹ انیل سْکھ دیو راؤ بونڈے نے مطالبہ کیا کہ حکومت ہیم لیبرا دوا کو ضروری ادویات کی فہرست میں شامل کرے۔ ہیم لیبرا ہیموفیلیا اے کے مریضوں میں خون بہنے سے بچانے یا اسے کم کرنے کے لیے استعمال ہوتی ہے۔
بی جے پی کی رکنِ پارلیمنٹ سنگیتا یادو نے ملک بھر میں فیملی کیئر مراکز قائم کرنے کی ضرورت پر زور دیا، جو بزرگ افراد اور یتیم بچوں کے لیے گھروں کا کردار ادا کر سکیں۔ انہوں نے کہا کہ ’فیملی کیئر سسٹم‘ کو قومی سطح پر نافذ کیا جانا چاہیے۔
کانگریس کے رکنِ پارلیمنٹ نیراج ڈانگی نے مطالبہ کیا کہ راجستھانی زبان کو بھارتی آئین کے آرٹیکل ۳۴۵ کے تحت سرکاری زبان اور آئین کی آٹھویں شیڈول میں شامل کیا جائے۔
بی جے پی کی رکنِ پارلیمنٹ مایا ناروَلیّا نے مطالبہ کیا کہ ٹرین نمبر ۱۱۷۲۰‘جبل پور رائے پور انٹر سٹی ایکسپریس ‘کا نام تبدیل کر کے آچاریہ ودیا ساگر انٹر سٹی ٹرین یا مْوک مَتی انٹر سٹی ٹرین رکھا جائے۔
بی جے پی کے رکنِ پارلیمنٹ سکندر کمار نے حکومت سے مطالبہ کیا کہ ہماچل پردیش میں اسٹارٹ اپس، اسکل ڈیولپمنٹ اور دیگر پیشہ ورانہ تربیت کو فروغ دیا جائے تاکہ نوجوانوں کو روزگار کے لیے دیگر ریاستوں کی طرف نقل مکانی نہ کرنا پڑے۔