سرینگر/یکم دسمبر
کانگریس کی رکن پارلیمنٹ پرینکا گاندھی واڈرا نے پیر کے روز وزیر اعظم نریندر مودی کے پارلیمنٹ اجلاس سے پہلے دیے گئے ’ڈلیوری، ڈراما نہیں‘ والے بیان پر سخت جواب دیتے ہوئے کہا کہ اہم مسائل پر بات کرنا ڈراما نہیں ہے۔
پرینکا نے دوٹوک انداز میں کہا’’ڈراما یہ ہے کہ بحث کی اجازت نہ دی جائے، ڈراما یہ ہے کہ جمہوری بحث کو عوام کے سامنے آنے سے روکا جائے‘‘۔
کانگریسی رکن لوک سبھا نے انتخابی صورتحال، اسپیشل انٹینسو رول (ایس آئی آر)، اور دہلی کی فضائی آلودگی کو ’بڑے مسائل‘ قرار دیتے ہوئے کہا’’آئیے ان پر بات کریں۔ آخر پارلیمنٹ کس لیے ہے‘‘؟
پارلیمنٹ کی کارروائی شروع ہونے سے قبل عمارت کے باہر بات کرتے ہوئے مودی نے زور دیا تھا کہ ایوان کو ڈلیوری پر توجہ دینی چاہیے، ڈرامے پر نہیں، اور کہا تھا کہ سرمائی اجلاس شکست کی جھنجھلاہٹ کے میدان میں تبدیل نہیں ہونا چاہیے، اور نہ ہی جیت کے گھمنڈ کا اکھاڑا بننا چاہیے۔
ہنس دوار، پارلیمنٹ ہاؤس میں میڈیا سے خطاب میں مودی نے اپوزیشن کو مخاطب کرتے ہوئے کہا تھا’’انتخابی شکست کے صدمے سے باہر نکلیں اور ایوان کی بحثوں میں مضبوط نکات اٹھائیں‘‘۔
ایک روز قبل ہونے والی کل جماعتی میٹنگ میں اپوزیشن نے متفقہ طور پر ایوان کے اندر کئی مسائل پر بحث کا مطالبہ کیا تھا، جن میں انتخابی فہرستوں کی اسپیشل انٹینسو ریویڑن (ایس آئی آر)، حالیہ لال قلعہ دھماکہ، فضائی آلودگی، اور حکومت کی خارجہ پالیسی سے متعلق پیش رفت شامل تھیں۔
اپوزیشن نے حکومت کے نہ ماننے کی صورت میں کارروائی روکنے کی وارننگ بھی دی تھی۔ویب ڈیسک
