پلوامہ میں دو منشیات فروش گرفتار

سرینگر/ یکم دسمبر
منشیات کے خلاف ایک بڑی کارروائی میں پلوامہ پولیس نے دو منشیات فروشوں کو گرفتارکرکے بڑی مقدار میں بروئن شوگر جیسا ممنوعہ مواد بر آمد کیا۔
ایک پولیس ترجمان نے اپنے ایک بیان میں کہا کہ نارکو، ٹیرر سپلائی چین کے خلاف ایک بڑی کارروائی میں پلوامہ پولیس نے دو منشیات اسملگروں کو گرفتار کرکے ایک کلو ۱۳۰گرام برئون شوگر جیسا ممنوعہ مواد بر آمد کیا ہے ۔
ترجمان نے کہا کہ یہ کارروائی ایک معمول کی چیکنگ کے دوران عمل میں لائی گئی۔
ان کا کہنا ہے کہ پولیس پوسٹ رہمو کی ایک پارٹی نے رہمو پل پر ناکہ چیکنگ کے دوران ایک مشکوک ٹاٹا موبائل گاڑی کو روکا۔
پولیس ترجمان نے بتایا کہ ناکہ پارٹی کی مستعدی اور پیشہ ورانہ کارروائی کے نتیجے میں گاڑی میں سوار دونوں افراد کو حراست میں لیا گیا جن کی شناخت منیر احمد شیخ ولد عبدالحمید شیخ ساکن حاجی ترا کرنا اور توفیق احمد شیخ ولد محمد رفیق شیخ ساکن حاجی ترا کرنا کے طور پر ہوئی ہے ۔
ترجمان نے کہا کہ گاڑی کی مکمل تلاشی کے دوران پولیس نے ایک کلو۱۳۰گرام برئون شوگر جیسا ممنوعہ مواد بر آمد کیا جس سے ضلع میں ایک بڑے منشیات نیٹ ورک کی کوشش ناکام بن گئی۔
ان کا کہنا ہے کہ اس سلسلے میں پولیس اسٹیشن راج پورہ میں این ڈی پی ایس ایکٹ کے تحت زیر ایف آئی آر نمبر۲۰۲۵/۱۲۴؍ایک مقدمہ درج کیا گیا اور مزید تحقیقات شروع کی گئی۔
۔۔۔۔۔۔۔